მარგველაშვილი კობახიძეს: საზოგადოებაში პრობლემებია და ამას თვალი უნდა გავუსწოროთ

საქართველოს პრეზიდენტს უკვირს, რატომ ადარებს პარლამენტის თავმჯდომარე ერთმანეთს 2012 წლამდე და მას შემდეგ არსებულ პერიოდს. ის ამბობს, რომ 2012 წლის შემდეგ ბევრი რამ შეიცვალა, თუმცა, პრობლემაც ბევრია. 

"უცნაურია, როცა ამას მახსენებენ მე, მაშინ, როცა ძალიან ბევრი 2012 წლამდე საერთოდ არ მინახავს. რატომ ედრებით 2012 წელს? საზოგადოებაში პრობლემებია და ამას თვალი უნდა გავუსწოროთ. ესაუბრეთ საზოგადოებას, იარეთ ჩემთან ერთად რაიონებში. იმაში პრობლემური არაფერია, რომ საკონსტიტუციო თემატიკაზე ვესაუბროთ ხალხს და მოვისმინოთ მათი აზრი. პარალელურად, მოვისმინოთ მათი აზრი იმ პრობლემებზე, რომელიც მათ აქვთ", - თქვა მარგველაშვილმა. 

მისი თქმით, ორი პოლუსის გარდა, არსებობს ადამიანი, რომელსაც პოლიტიკური დაპირისპირება არ აინტერესებს და ყოველდღიური სირთულეები აქვს გადასაჭრელი. "ამასთან დაკავშირებით არც 2012 წლამდე შემიცვლია პოზიცია და არც მას მერე. ამ პოზიციებს იმ იმედით გიზიარებთ, რომ ამ დიალოგის ფარგლებში პრობლემების გადაწყვეტის სულისკვეთება დავინახო", - განაცხადა მარგველაშვილმა.

გიორგი მარგველაშვილის თქმით, პრეზიდენტი, მისი ადმინისტრაცია და უშიშროების საბჭო მზად არან კონსტრუქციული თანამშრომლობისთვის როგორც პარლამენტთან, ისე აღმასრულებელ ხელისუფლებასთან.