სოციალური დახმარებების შეწყვეტის მიზეზი გადამოწმების პროცესია

ჯანდაცვის მინისტრის მოადგილე ზაზა სოფრომაძე, მოქალაქეებისთვის სოციალური დახმარებების შეწყვეტასთან დაკავშირებით,"ევროპული საქართველოს" წევრ ზურაბ ჭიაბერაშვილს პასუხობს.

სოფრომაძის განცხადებით, მოქალაქეებისთვის სოციალური დახმარებების შეწყვეტის მიზეზი გადამოწმების პროცესია. ჯანდაცვის მინისტრის მოადგილის განმარტებით, ყოველთვიურად ათასობით მოქალაქეს ენიშნება და უჩერდება დახმარება.

ზაზა სოფრომაძის თქმით, გადამოწმების პროცესი საერთაშორისო ორგანიზაციებთან აღებული ვალდებულებების თანახმად აგვისტოში უნდა დასრულდეს და თანხის სრული რაოდენობა მიზნობრივად სხვადასხვა სოციალური პროგრამებისკენ მიემართება. სოფრომაძე ოპონენტებს მოუწოდებს, საკითხს პოლიტიკური მანიპულაციებისთვის ნუ გამოიყენებენ.

"ევროპული საქართველოს" წევრმა ზურაბ ჭიაბერაშვილმა დღეს ბრიფინგი გამართა, სადაც ადამიანებისთვის სოციალური დახმარების მოხსნაზე ილაპარაკა. ჭიაბერაშვილის თქმით, ჯანდაცვის სამინისტროს ოფიციალური მონაცემებით, ოქტომბრიდან დღემდე შემწეობა 53 000 მოქალაქეს მოეხსნა, აქედან 17 000 პენსიონერია, 7 000 კი ბავშვი. 53 000 შემწეობამოხსნილი მოქალაქიდან 43 000 სოფლად ცხოვრობს.