"ბავშვთა სამყაროს" მოვაჭრეებს ევროკავშირის წარმომადგენლობაში დამატებითი დოკუმენტაცია მოსთხოვეს

ევროკავშირის წარმომადგენლობაში გამართულ შეხვედრაზე "ბავშვთა სამყაროს" ხანძრის შედეგად დაზარალებულებს დამატებითი დოკუმენტაცია მოსთხოვეს და კიდევ ერთი შეხვედრა თვის ბოლოს დაუნიშნეს. ამის შესახებ ადვოკატმა მარიამ არევაძემ განაცხადა. მისი თქმით, სწორედ თვის ბოლოს გაირკვევა, გაუწევს თუ არა დახმარებას ევროკავშირი დაზარალებულ მოვაჭრეებს.

"ბავშვთა სამყაროს" ხანძრის შედეგად დაზარალებულთა აქცია ევროკავშირის წარმომადგენლობასთან დაახლოებით 2 საათი გაგრძელდა. ამ წუთებში მოვაჭრეებმა საკრებულოში გადაინაცვლეს, სადაც სავარაუდოდ საკრებულოს თავმჯდომარის მოადგილეს გიორგი ტყემალაძეს შეხვდებიან.

მოვაჭრეთა მოთხოვნა უცვლელია. ისინი 5000 ლარიან კომპენსაციას, დაზარალებულის სტატუსის მინიჭებას და საბოლოოდ ზარალის სრულად ანაზღაურებას ითხოვენ.

"ბავშვთა სამყაროს" ხანძრით დაზარალებულებს 3 000 ლარი, 24 მარტს, ერთჯერადი კომპენსაციის სახით, თბილისის საკრებულომ შესთავაზა. ისინი საწყის ეტაპზე 5000 ლარს, მოგვიანებით კი ზარალის სრულად ანაზღაურებას ითხოვენ.

თბილისში, თევდორე მღვდლის ქუჩაზე არსებული "ბავშვთა სამყარო" 30 იანვარს დაიწვა, რამაც მოვაჭრეების პროდუქცია, ფაქტობრივად, სრულად გაანადგურა. დაზარალებულებმა რამდენიმე საპროტესტო აქცია მოაწყვეს და ხელისუფლებას მოთხოვნები წაუყენეს. 21 თებერვალს კი მათ დამწვარ "ბავშვთა სამყაროსთან" შიმშილობის აქცია დაიწყეს.