სომხეთის მოქალაქე 30 წლის წინ მიწისძვრის დროს დახმარებისთვის საქართველოს მადლობას უხდის

სომხეთში საქართველოს საელჩო წერილს აქვეყნებს, რომელშიც სომხეთის მოქალაქე 30 წლის წინ სპიტაკში აღმოჩენილი დახმარებისთვის საქართველოს მადლობას უხდის. ინფორმაციას 1tv ავრცელებს.

„ბატონო ელჩო, თქვენ გწერთ ახალგაზრდა, რომელიც 1988 წელს პატარა ბავშვი იყო. მინდა, გულწრფელი მადლობა გადავუხადო თქვენს მაშველებს, რომლებიც ადამიანებს ნანგრევებიდან ამოსვლაში ეხმარებოდნენ. მაშინ ბევრი არაფერი მესმოდა, მაგრამ კარგად მახსოვს კარავში შეფარებული ჩვენი ოჯახის გადარჩენილი წევრების, მაგალითად, ბაბუაჩემის სიტყვები: „ღმერთმა დალოცოს ეს მაშველები, ასეთი საშინელება მათ არასოდეს განიცადონ“. მაშინ არ გვყავდნენ ჩვენი მაშველები, ახლა კი გვაქვს ძლიერი საგანგებო სიტუაციების სამინისტრო. მათი მადლობელი ვარ და მზად ვარ, ვიყო ერთ-ერთი პირველი, ვინც საჭიროების შემთხვევაში დაგეხმარებათ. ყოველთვის მზად ვარ მხარდაჭერისთვის“, - ნათქვამია ვარდითერ ბაღდასარიანის წერილში.

1988 წლის 7 დეკემბერს 11:41 საათზე სომხეთში სპიტაკის 7,2 მაგნიტუდის მიწისძვრა მოხდა. ეს მიწიძვრა მეოცე საუკუნის ერთ-ერთი ყველაზე დამანგრეველი იყო. დაიღუპა 25 ათასი ადამიანი და ნახევარმა მილიონმა სახლი დაკარგა. რამდენიმე ქალაქი და სოფელი ნაწილობრივ ან მთლიანად გაქრა.

სომხეთის ქალაქ სპიტაკის მიწისძვრის შედეგად დაღუპულებს დღეს საქართველოშიც იხსენებენ. თბილისში, „სურბ ეჯმიაწინ“ ეკლესიაში სიმბოლურად 30-ჯერ დაირეკა ზარები, რადგან მიწისძვრიდან 30 წელი გავიდა.