ევროპული საქართველო: რუსეთი ზურაბიშვილის განცხადებებს საქართველოს წინააღმდეგ ჰააგაში იყენებს

პარტია „ევროპული საქართველოს“ ინფორმაციით, ეთნოწმენდის და ოკუპაციის გამო საქართველოს მიერ რუსეთის წინააღმდეგ ჰააგის სასამართლოში შეტანილ სარჩელზე რუსეთმა წარადგინა საპასუხო სარჩელი, რომელშიც ერთ-ერთ არგუმენტად იყენებს ციტატებს სალომე ზურაბიშვილის წიგნიდან. ამის შესახებ "რადიო თავისუფლება" წერს.

„ევროპული საქართველოს“ პრეზიდენტობის კანდიდატმა, დავით ბაქრაძემ თბილისში დღეს გამართულ ბრიფინგზე წარადგინა შესაბამისი ამონაწერი ჰააგის საერთაშორისო სასამართლოდან.

„ეს არის უკვე მომხდარი და შემდგარი ფაქტი, რომელიც ადასტურებს, რომ ზურაბიშვილის მოსაზრებებს და მის ხედვას იყენებს ოკუპანტი იმისთვის, რომ ჰააგის სასამართლოში გაამართლოს საქართველოს ოკუპაცია და ქართველების ეთნიკური წმენდა“, - განაცხადა დავით ბაქრაძემ.

მისი ინფორმაციით, რუსეთის საპასუხო სარჩელში მითითებულია სალომე ზურაბიშვილის წიგნის 137-139 გვერდები. ბაქრაძის თქმით, ზურაბიშვილის განცხადებები არის საშიში და ზიანის მომტანი ქვეყნის ეროვნული უსაფრთხოებისთის და საშიში საქართველოს გაერთიანების პერსპექტივისთვის.

ოპოზიციის მიზანია, რომ წინასაარჩევნოდ სალომე ზურაბიშვილის პერსონის დისკრედიტაცია მოახდინონ, - ამის შესახებ პარლამენტის ადამიანის უფლებათა დაცვის კომიტეტის თავმჯდომარემ სოფო კილაძემ ჟურნალისტებს განუცხადა. ამით კილაძე გამოეხმაურა „ევროპული საქართველოს" მიერ გავრცელებულ ინფორმაციას, რომლის მიხედვითაც რუსეთი ჰააგის სასამართლოში საქართველოს წინააღმდეგ არგუმენტად სალომე ზურაბიშვილის წიგნიდან ციტატებს იყენებს. კილაძის თქმით, მას ზურაბიშვილის წიგნი წაკითხული არ აქვს, თუმცა ფიქრობს, რომ ოპოზიცია მის არასწორ ინტერპრეტაციას ახდენს.