ანა შეპკინა
კასპში ნაცმოძრაობა და ზურაბიშვილის მხარდამჭერები ერთმანეთს ფიზიკურად დაუპირისპირდნენ
პოლიტიკა

დაპირისპირება კასპში
ფოტო: ანა შეპკინა
დამოუკიდებელი საპრეზიდენტო კანდიდატი სალომე ზურაბიშვილი შიდა ქართლში მოსახლეობასთან შეხვედრებს აგრძელებს. კასპში შეხვედრას წინ სიტყვიერი და ფიზიკური დაპირისპირება უძღოდა, რომელიც ნაციონალური მოძრაობის წარმომადგენლებსა და შეხვედრაზე შეკრებილებს შორის მოხდა.
ნაცმოძრაობის წევრები სალომე ზურაბიშვილთან შეხვედრას და კითხვის დასმას ითხოვდნენ. ვითარება პოლიციის ჩარევის შემდეგ განიმუხტა.
კიდევ ერთი ინციდენტი დარბაზში ზურაბიშვილის გამოსვლის დაწყებამდე მოხდა. უცნობმა ადამიანმა დარბაზში შეკრებილებს მიმართა და სალომე ზურაბიშვილსა და მის მხარდამჭერებს რუსეთის აგენტი უწოდა. ის დარბაზიდან გაიყვანეს.
მომხდართან დაკავშირებით სალომე ზურაბიშვილმაც გააკეთა კომენტარი. ზურაბიშვილის თქმით, ადამიანები, რომლებიც მის შეხვვედრებზე დადიან და ყველა წესს არღვევენ, სხვადასხვა ქალაქიდან არიან წაყვანილები.
"მათ არ აქვთ ბევრი სათქმელი, მხოლოდ რამდენიმე სიტყვა და ამიტომ მაინტერესებდა როგორ გააგრძელებდა. დღეს, ასევე შემჩნეულია ყოფილი გამგებლის მოანგილე ანუ „ნაციონალური მოძრაობის“ წევრი, რომელიც არღვევდა საარჩევნო წესებს და გარემოს. ეს, არ არის ახალი, ეს არის იმ პარტიის ხელწერა, რომელმაც ვერ ისწავლა მოქცევა. თუ ვაცხადებთ, ევროპელობა გვინდა ან თუნდაც ქართველობა, რომელიც ზრდილობით იწყება, გარკვეული წესები დაცული უნდა იყოს. ბოლო პერიოდში რამდენჯერმე შემომთავაზეს, რომ ხელი მომეწერა ქარტიაზე, რომელიც თუ არ ვცდები ერთ-ერთი საელჩოს და ცესკოს ერთობლივი ინიციატივა იყო, რომ საპრეზიდენტო არჩევნებში მონაწილე კანდიდატებს აგვეღო ვალდებულება, კონკურენტებს ერთმანეთისადმი სიძულვილის ენა არ გამოგვეყენებინა. მე ამ ქარტიაზე ხელი არ მოვაწერე, რადგან არასდროს გამილანძღავს ჩემი ოპონენტები. ჩემი ქარტია არის ჩემი ზრდილობა და ქართველობა და დანარჩენების ხელმოწერები ჰგავს წარსულში საქართველოსადმი ისტორიულ ხელშეკრულებებზე რუსეთის ხელმოწერებს, მერე რომ არასდროს სრულდებოდა. როგორც მე ვუწოდებ, ერთი ბნელი ძალის ორი პარტიის წარმომადგენლები საზღვარგარეთ გავიდნენ ხელი რომ მოეწერათ რაღაც ქარტიზე იმის ნიშნად, რომ არ გალანძღავდნენ ერთმანეთს მაგრამ არა, ერთი იდეოლოგიის მატარებლები არიან, ვერ იკავებენ თავს და ერთმანეთსაც ლანძღავენ", - თქვა სალომე ზურაბიშვილმა.
ნაციონალური მოძრაობის მხარდამჭერებმა სალომე ზურაბიშვილსა და მოსახლეობას შორის გამართულ თითქმის ყველა შეხვედრაზე მოაწყეს აქციები.
საქართველოში საპრეზიდენტო არჩევნები 2018 წლის 28 ოქტომბერს გაიმართება.





