რუსთავში მოქალაქემ ბუნებრივი აირის მილი წყლის მილს მიუერთა

რუსთავში, ერთ-ერთ საცხოვრებელ კორპუსში მოქალაქემ წყლის გამაცხელებლის თვითნებურად მონტაჟის დროს, ბუნებრივი აირის მილი სასმელი წყლის მილზე მიაერთა. "ინტერპრესნიუსის" ცნობით, შემთხვევის ადგილზე მობილიზებული არიან ,,სოკარ-ჯორჯია გაზის“ რუსთავის სერვის ცენტრის თანამშრომლები, რომლებიც სისტემას სასმელი წყლისგან წმენდენ.

,,აბონენტმა თვითნებურად დაამონტაჟა წყლის გამაცხელებელი. მას შეეშალა მილები და წყლის მილი დააერთა გაზის მილის ადგილზე და მთელი სისტემა 32 ოჯახი და 32 ბუნებრივი აირის მრიცხველი სასმელი წყლით გაივსო. ახლა ყველა მრიცხველი უნდა მოიხსნას და გაიწმინდოს სისტემა, რომელშიც მინიმუმ 5 ლიტრი წყალია.  მოქალაქე ამბობს, რომ გამათბობელი ხელოსანმა შეცდომით დაუმონტაჟა.“, - განაცხადა ,,სოკარ-ჯორჯია გაზის“ რუსთავის სერვის ცენტრის ინჟინერმა.

"სოკარ გაზის" წარმომადგენელი ამბობს, რომ ეს შემთხვევა შეიძლება ფატალურად დამთავრებულიყო.