მერაბიშვილის საქმეზე გადაწყვეტილება მოგვიანებით გამოცხადდება

სტრასბურგის სასამართლოში ვანო მერაბიშვილის საქმის ხელახალი განხილვა დასრულდა. 17 მოსამართლისგან შემდგარი დიდი პალატის გადაწყვეტილება მოგვიანებით გამოცხადდება. ინფორმაციას იუსტიციის სამინისტრო ავრცელებს.

"მხარეების გამოსვლა (30-30 წუთი) და მხარეების დამაზუსტებელი გამოსვლა (10-10 წუთი) დასრულდა. სხდომა დაიხურა. გადაწყვეტილება მოგვიანებით გამოცხადდება", - აცხადებენ უწყებაში.

ადამიანის უფლებათა ევროპული სასამართლო საქართველოს მთავრობის სარჩელს განიხილავს. იუსტიციის სამინისტრომ ვანო მერაბიშვილის საქმეზე სტრასბურგის სასამართლოს 7 მოსამართლისგან შემდგარი პალატის 2016 წლის 14 ივნისის გადაწყვეტილება გაასაჩივრა. მაშინ მერაბიშვილის სარჩელი ნაწილობრივ დაკმაყოფილდა - ევროპული კონვენციის ორი მუხლის დარღვევა დადგინდა. გადაწყვეტილებაში ნათქვამია, რომ მერაბიშვილის პატიმრობა კანონიერი იყო, მაგრამ კითხვის ნიშანი მისი საკნიდან სავარაუდო გაყვანის (2013 წლის 14 დეკემბერი) საქმეზე გაჩნდა.