სერგეენკო: დაზღვევის ბაზების განახლებამდე 115 000 ადამიანი დისკრიმინირებული იყო

ჯანდაცვის მინისტრის დავით სერგეენკოს განცხადებით, საყოველთაო ჯანდაცვის ბაზების განახლებამდე დისკრიმინაციულ მდგომარეობაში 115 000 ადამიანი იმყოფებოდა, ორმაგი დაფინანსებით კი 55 ათასი ადამიანი სარგებლობდა. ინფორმაციას ბიზნესკონტრაქტი სერგეენკოზე დაყრდნობით ავრცელებს.

სერგეენკოს თქმით, ეს პრობლემა ბაზების განუახლებლობით იყო გამოწვეული, შედეგად ორი ჯგუფი ჩამოყალიბდა. პირველი - დისკრიმინირებული ადამიანები, ვისაც კერძო დაზღვევა ჰქონდა და მასზე უარის თქმის შემდეგ, ვეღარ დაიბრუნეს საყოველთაო ჯანდაცვის საბაზისო პაკეტი; მეორე - ადამიანები, რომლებსაც 2013 წელს არ ჰქონდათ კერძო დაზღვევა, გახდნენ საყოველთაოს მონაწილეები და შემდგომში შეიძინეს კერძო დაზღვევა, თუმცა სარგებლობდნენ ორმაგი დაფინასებით. 

"ეს ორი მნიშვნელოვანი დისკრიმინაციული მომენტი გაბათილდება", - განმარტა დავით სერგეენკომ.

რამდენიმე დღეში ჯანდაცვის სამინისტრო საყოველთაო ჯანდაცვის პროგრამის შესახებ პრეზენტაციას გამართავს. 1 მარტიდან საყოველთაო ჯანდაცვის პროგრამაში ჩასართავად ახალი კრიტერიუმები ამოქმედდა.