საქართველოს დამოუკიდებლობის იუბილეს ბრიტანეთის დედოფალი ელისაბედ მეორე ულოცავს

მისი უდიდებულესობა დედოფალი ელისაბედ მეორე საქართველოს პრეზიდენტს და საქართველოს მოსახლეობას დამოუკიდებლობის დღეს ულოცავს, ამის შესახებ ბრიტანეთის საელჩოს Facebook-ის გვერდზე გამოქვეყნებულ წერილში წერია.

“დიდი სიხარულით გილოცავთ ეროვნულ დღესასწაულს თქვენ და საქართველოს მოსახლეობას და ბედნიერებას და იღბალს გისურვებთ. წელს ეს დღე განსაკუთრებულია, ვინაიდან საქართველო პირველი ქართული დემოკრატიული რესპუბლიკის დაარსებიდან ასი წლის თავს აღნიშნავს.

ასეთ დროს ვფიქრობ ჩვენს ქვეყნებს შორის ახლო კავშირებზე, როგორც ისტორიულზე ისე ამჟამინდელ და სამომავლოზე”,- წერია ბრიტანეთის საელჩოს Facebook-ის გვერდზე.

მისალოცი ვიდეომიმართვა გაავრცელა ასევე ევროკაცშირის ელჩმა. საქართველოს დამოუკიდებლობის დღეს ქართულად ულოცავს საქართველოში აშშ-ის ელჩიც.

კორპორაცია Google საქართველოს დამოუკიდებლობის დღეს და საქართველოს დემოკრატიული რესპუბლიკის 100 წლის იუბილეს ე.წ. დუდლით ულოცავს.

26 მაისს, პირველი რესპუბლიკის 100 წლისთავისადმი მიძღვნილ საზეიმო ღონისძიებებში მონაწილეობას 7 პრეზიდენტი და 20-მდე ქვეყნის უმაღლესი რანგის დელეგაცია მიიღებს.