სალაძე: პარლამენტს შეუძლია არც ვეტო გაიზიაროს და მაუწყებლის კანონიც არ დაამტკიცოს

საია-ს თავმჯდომარე სულხან სალაძე მაუწყებელთან დაკავშირებით შექმნილი ვითარებიდან გამოსავლად მიიჩნევს, პარლამენტმა არც პრეზიდენტის ვეტო გაიზიაროს და შემდგომ კენჭისყრაზე არც კანონპროექტს დაუჭიროს მხარი.

როგორც სალაძემ განაცხადა, იმ შემთხვევაში, თუ საპარლამენტო უმრავლესობას არ სურს პრეზიდენტის მოტოვირებული შენიშვნების გაზიარება, ეს იქნება გამოსავალი და შესაძლებლობა, "მაუწყებლობის შესახებ" კანონში ყველასთვის მისაღები ცვლილებების მოსამზადებლად.

მისივე განმარტებით, თუკი პარლამენტს არ სურს პრეზიდენტის ვეტოს გაზიარება, მარტივად შეუძლია, არც ვეტო გაიზიაროს და შემდგომში კენჭისყრაზე არც კანონპროექტს დაუჭიროს მხარი. ამით შეიქმნება საფუძველი, ისეთი ცვლილებები მოვამზადოთ, რომელიც მოწონებული იქნება ყველა მხარის და არა მხოლოდ ერთი კონკრეტული ჯგუფის მიერ", - განაცხადა სალაძემ.

მაუწყებლობის შესახებ კანონპროექტთან დაკავშირებით პრეზიდენტის მოტივირებულ შენიშვნებზე დარგობრივი ეკონომიკის კომიტეტმა 14 თებერვალს გადაწყვეტილება ვერ მიიღო. კომიტეტის წევრთა ხმები შუაზე გაიყო.

22 დეკემბერს პარლამენტში "მაუწყებლობის შესახებ" საკანონმდებლო პაკეტს მხარი მესამე მოსმენით, 63-მა პარლამენტარმა დაუჭირა.

საქართველოს პრეზიდენტმა მაუწყებლის კანონპროექტს ვეტო 15 იანვარს დაადო. 26 იანვარს კი პარლამენტის თავმჯდომარემ ირაკლი კობახიძემ მაუწყებლის კანონის შესახებ მედიაორგანიზაციებთან შეხვედრაზე თქვა: "ხელი მიკანკალებდა, როცა საზოგადოებრივი მაუწყებლის ბიუჯეტს ვიღებდით"