გიორგი კახიანი: ეკონომიკური სანქცია არ არის მხოლოდ ეკონომიკურ შედეგებზე გათვლილი. როდესაც რუსეთ-უკრაინის ომი მიმდინარეობს და შენს ტერიტორიაზე განლაგებულია ოკუპანტის ჯარი, ასეთი პოლიტიკური აქტი აუცილებლად გამოიწვევდა მდგომარეობის ესკალაციას

პარლამენტის თავმჯდომარის მოადგილემ გიორგი კახიანმა საკონსტიტუციო სასამართლოში რუსეთ-უკრაინის ომის დაწყებისას ოპოზიციის მიერ საქართველოს ხელისუფლების მისამართით წამოყენებულ მოთხოვნებზე ილაპარაკა. კახიანი შეეხო რუსეთის ფედერაციისთვის ფინანსური სანქციების დაწესების მოთხოვნას და აღნიშნა, რომ ეკონომიკური სანქცია „იმ ვითარებაში აღქმული იქნებოდა, როგორც პოლიტიკური აქტი.“

მისივე თქმით, ხელისუფლებას მიზანმიმართულად სთხოვდნენ ისეთი ქმედებების გატარებას, რომელიც საფრთხის შემცველი იქნებოდა ტერიტორიული მთლიანობისთვის და დამოუკიდებლობისთვის.

„რეალურად ეკონომიკური სანქციის დაწესება, გარდა იმისა, რომ ეკონომიკური თვალსაზრისით დამაზიანებელი იქნებოდა ჩვენი ქვეყნისთვის, ეკონომიკური სანქცია, რა თქმა უნდა, იმ ვითარებაში იქნებოდა აღქმული როგორც პოლიტიკური აქტი და ასეც არის. ეკონომიკური სანქცია არ არის მხოლოდ ეკონომიკურ შედეგებზე გათვლილი. ამ ვითარებაში, როდესაც ომი მიმდინარეობს, რუსეთ-უკრაინის ომი, როდესაც შენს ტერიტორიაზე განლაგებულია ოკუპანტის ჯარი და დედაქალაქიდან 40 კილომეტრის მანძილზე არის განლაგებული რუსეთის შეიარაღებული ჯარები, ბუნებრივია, ასეთ ვითარებაში ასეთი პოლიტიკური აქტი და არა მხოლოდ აქტი, აქ ლაპარაკი იყო მოხალისეების ორგანიზებაზე და იქ გაგზავნაზე, ეს ყველაფერი აუცილებლად გამოიწვევდა მდგომარეობის ესკალაციას. ეს ყველაფერი მიზანმიმართულად ხდებოდა.

წარსულის გამოცდილების გათვალისწინებით, ეს რომ არ სცოდნოდათ ოპოზიციურ პოლიტიკურ პარტიებს, რომლებიც ამას მხარს უჭერდნენ, ეს წარმოუდგენელია, ხომ? ძალიან მძიმე წარსულის გამოცდილება გვაქვს ყოველივე ამის. ისინი ხელისუფლებას მიზანმიმართულად სთხოვდნენ ისეთ ქმედებებს, რომელიც საფრთხის შემცველი იქნებოდა ტერიტორიული მთლიანობისთვის და დამოუკიდებლობისთვის. აი, ამაზეა ლაპარაკი და ეს მხოლოდ ეკონომიკური სანქციების დადგენაზე არ არის, აქ არის უფრო სხვა მიზანმიმართულ ქმედებებზე. მოთხოვნები მხოლოდ მოთხოვნები ხომ არ იყო, ეს მოთხოვნები გამოიხატებოდა საპროტესტო აქციებით და ხელისუფლებაზე წნეხით, რომ ასეთი ნაბიჯები გადადგმულიყო, რომელიც იქნებოდა მძიმე შედეგის მომტანი ქვეყნის ტერიტორიული მთლიანობისთვის და დამოუკიდებლობისთვის“, - განაცხადა გიორგი კახიანმა.