„რეპორტიორები საზღვრებს გარეშე“ თუ „დეზინფორმატორები საზღვრებს გარეშე“ - რეალურად ვინ იყო და არის თავისუფალი სიტყვის და მედიის მთავარი მტერი საქართველოში. „იმედის კვირის“ საავტორო რეპორტაჟი

არსებობს ასეთი ორგანიზაცია - „რეპორტიორები საზღვრებს გარეშე“, რომელიც სუბიექტურობისა და მიკერძოებულობის საკუთარ რეკორდებს ხსნის, - განაცხადა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა ირაკლი ჩიხლაძემ აღნიშნული ორგანიზაციის მიერ მომზადებული სიის შესახებ რეპორტაჟის წარდგენისას.

მისი შეფასებით, ამ ორგანიზაციის სახელწოდება დიდი ხანია დასაკორექტირებელია და უმჯობესი იქნებოდა, მას „დეზინფორმატორები საზღვრებს გარეშე“ რქმეოდა.

„ორგანიზაციის ოფიციალურ ვებგვერდზე გამოქვეყნდა 2026 წლის ე.წ. თავისუფალი მედიის მიმტაცებლების სია, რომელშიც „ქართული ოცნების“ საპატიო თავმჯდომარეც მოხვდა ილონ მასკთან და დონალდ ტრამპთან ერთად.

გულწრფელად გეტყვით, საერთოდ, ყურადღებას არც გავამახვილებდი ამ ორგანიზაციის მიერ გამოქვეყნებულ მორიგ „შედევრზე“, მაგრამ მიმაჩნია, რომ მიმდინარე კვირაში ამ თემის იგნორირება არ შეიძლება. 7 ნოემბრის კვირაში, ტელეკომპანია „იმედის“ დარბევის 19 წლისთავზე, უნდა შევახსენოთ დამრბევებს, ამ პროცესის წამახალისებლებსა და შემსრულებლებს, რომ სწორედ 7 ნოემბერი და მედიაზე მიტანილი იერიში გახდა „ნაციონალური მოძრაობის“ დასასრულის დასაწყისი და სწორედ კოლექტიური „ნაციონალური მოძრაობა“ ცდილობს დღემდე მედიის სრულად განადგურებას.

რეალურად ვინ იყო და არის თავისუფალი სიტყვის და მედიის მთავარი მტერი ამ ქვეყანაში - წარმოგიდგენთ რეალურ სიას და მოგიყვებით სიმართლეს იმ ორგანიზაციის შესახებ, რომელიც, დიდი ალბათობით, დაკვეთით ავრცელებს ტყუილებს.

მედიაპლურალიზმის 14 წელი, რომელსაც გარე ძალები „ქართული ოცნებას“ ვერ ჰპატიობენ, და ჭეშმარიტება მედიაგარემოს შესახებ, რომელიც „კოლექტიური ნაციონალური მოძრაობის“ მედიაზონდერებს და ტელეაქტივისტებს სრულად ამხელს", - განაცხადა ირაკლი ჩიხლაძემ.

სანდრო გამსახურდიას საავტორო რეპორტაჟი.