რა მექანიზმებს იყენებს ბრიუსელის ევრობიუროკრატია იმის უზრუნველსაყოფად, რომ ევროკავშირის გრანტები პირდაპირ ან ირიბად არ მოხმარდეს საჯარო დემონსტრაციებისას ძალადობრივი ქმედებების მხარდაჭერას - „იმედის კვირამ“ კითხვებით ევროკომისიას 29 ოქტომბერს მიმართა, პასუხი ამ დრომდე არ მიუღია

რა მექანიზმებს იყენებს ბრიუსელის ევრობიუროკრატია იმის უზრუნველსაყოფად, რომ ევროკავშირის გრანტები პირდაპირ ან ირიბად არ მოხმარდეს საჯარო დემონსტრაციებისას ძალადობრივი ქმედებების მხარდაჭერას, ორგანიზებას ან ხელშეწყობას, როგორც ეს საქართველოში მოხდა, - „იმედის კვირამ“ 29 ოქტომბერს კითხვებით ევროკომისიას მიმართა.

„იმედის კვირა“ ასევე დაინტერესდა, გადაამოწმა თუ არა ევროკომისიამ, დაფინანსდა თუ არა პირდაპირ ან ირიბად ევროკავშირის გრანტებით საქართველოში ბოლო წლებში რადიკალური აქციებისთვის პიროტექნიკის, ნიღბების და სხვა იმ საშუალებების შეძენა, რომელიც გამიზნული იყო ექსტრემისტულ აქციებზე სამართალდამცველების და ასევე, საზოგადოებრივი ქონების დაზიანებისთვის.

კერძოდ, „იმედი კვირამ“ ქართული ორგანიზაციებისა და დამცავი აღჭურვილობის შესყიდვასთან დაკავშირებით ევროკომისიას ჰკითხა:

„საქართველოში რამდენიმე სამოქალაქო ორგანიზაციამ, მათ შორის „სამართლიანმა არჩევნებმა“ (ISFED) და „საქართველოს დემოკრატიულმა ინიციატივამ“ (GDI), დაადასტურა ისეთი დამცავი აღჭურვილობის შეძენა, როგორიცაა პირბადეები, დამცავი სათვალეები და აირწინაღები. ორგანიზაციების განმარტებით, ეს ნივთები განკუთვნილი იყო მონიტორების, დამკვირვებლებისა და მოქალაქეების დასაცავად აქციების დროს ცრემლსადენი გაზისა და სხვა სპეციალური საშუალებების ზემოქმედებისგან. „სოციალური სამართლიანობის ცენტრის“ ხელმძღვანელმა თამთა მიქელაძემაც დაადასტურა, რომ ორგანიზაციამ თანამშრომელი ქალების დასაცავად შეიძინა წიწაკის სპრეი, ხოლო აქციებზე მომუშავე თანამშრომლებისთვის — რესპირატორები და დამცავი სათვალეები. გადაამოწმა თუ არა ევროკომისიამ, დაფინანსდა თუ არა ამ შესყიდვებიდან რომელიმე პირდაპირ ან ირიბად ევროკავშირის გრანტებით?"

„იმედის კვირას“ კითხვებზე პასუხები ამ დრომდე არ მიუღია.