ზურაბ ქადაგიძე: საზოგადოებამ იცის, რა მასშტაბის ქველმოქმედია ბიძინა ივანიშვილი და რას აკეთებს ის ქვეყნისთვის და ამავე საზოგადოებამ ძალიან კარგად იცის ისიც, თუ რას წარმოადგენს კოლექტიური ნაცმოძრაობა

„ხალხის ძალის“ წევრი, დეპუტატი ზურაბ ქადაგიძე „ნაძირალების სამჭედლოს“ უწოდებს იმ ძალას, რომლის წარმომადგენლებმაც ეჭვქვეშ დააყენეს ბიძინა ივანიშვილის ქველმოქმედება. როგორც მან ჟურნალისტებთან განაცხადა, ნიკა გვარამიას მხრიდან მსგავსი შეურაცხმყოფელი განცხადება გასაკვირი არ არის, ვინაიდან ის ყოველთვის გამოირჩეოდა მსგავსი გამონათქვამებით.

ზურაბ ქადაგიძემ ხაზი გაუსვა იმას, რომ საზოგადოება ხედავს, თუ რა გააკეთა და რას აკეთებს ივანიშვილი ქვეყნისთვის და რა გააკეთა მიხეილ სააკაშვილმა.

„ნაციონალური მოძრაობა, პირობითად რომ ვთქვათ, ნაძირალების სამჭედლოა. ბიძინა ივანიშვილის მისამართით გამოთქმული ბრალდებები არ მიკვირს, იმიტომ, რომ ეს ადამიანი [ნიკა გვარამია] ყოველთვის გამოირჩეოდა ასეთი სიგიჟეებით და მიზანმიმართული განცხადებებით. მან ძალიან კარგად იცის, საით გადაიხრება სასწორი, თუ პინაზე დადებ კოლოსალურ ქველმოქმედებას, სახელმწიფოს უპირობო მხარდაჭერას ბიძინა ივანიშვილისა და მისი ოჯახის მხრიდან, საპირისპირო მხარეს კი - გვარამიას ბელადის, სააკაშვილის გაკეთებულ საქმეებს - ეს ადვილი მისახვედრია.

საზოგადოებამ ძალიან კარგად იცის ბიძინა ივანიშვილის ქველმოქმედება. ცნობილია ისიც, თუ რა ნაბიჯები გადადგა მან საკუთარი ოჯახის უსაფრთხოების ხარჯზე, რამაც ჯერ 2012 წლამდე და შემდეგ, დღემდე მოგვიყვანა. ხალხმა ძალიან კარგად იცის, რა მასშტაბის ქველმოქმედია ბიძინა ივანიშვილი, მისი ოჯახი და რას აკეთებს ის ქვეყნისთვის დღემდე. ამავე საზოგადოებამ ასევე ძალიან კარგად იცის, თუ რას წარმოადგენს კოლექტიური ნაცმოძრაობა. ყოველივე ამის შემფასებელი კი არის არჩევნები,“ - განაცხადა ზურაბ ქადაგიძემ.