დავით მათიკაშვილი გიგაურის განცხადებაზე: კიდევ ერთხელ დასტურდება ამ ყველაფრით, რომ არანაირი ე.წ. სამოქალაქო სექტორი საქართველოში არც არსებობდა ამ მდიდარი „ენჯეოების“ სახით

კიდევ ერთხელ დასტურდება ამ ყველაფრით, რომ არანაირი ე.წ. სამოქალაქო სექტორი საქართველოში არც არსებობდა ამ მდიდარი „ენჯეოების“ სახით, - ასე გამოეხმაურა დავით მათიკაშვილი „საერთაშორისო გამჭვირვალობის“ ხელმძღვანელის, ეკა გიგაურის განცხადებას ოპოზიციისა და არასამთავრობო ორგანიზაციების ერთობლივი მოქმედების შესახებ.

პარლამენტის საპროცედურო საკითხთა კომიტეტის თავმჯდომარის შეფასებით, ეს კიდევ ერთი დასტურია იმის, თუ რატომ უნდა აიკრძალოს 5 პოლიტიკური პარტია.

„პრინციპში, ეს ე.წ. ენჯეო სექტორი და „ნაცმოძრაობა“ იყო ერთი მთლიანი პოლიტიკური სხეული. არსად დაინდეს საკუთარი ქვეყანა, სადაც კი შეეძლოთ, რომ ფეხი წამოედოთ ჩვენი ქვეყნის განვითარებისთვის. საზოგადოებისთვის ეს ვითომ დაპირისპირება კიდევ ერთი დასტურია იმის, თუ რატომ უნდა აიკრძალოს ეს მეხუთე კოლონა - კოლექტიური „ნაცმოძრაობა“, როგორც ერთიანი პოლიტიკური სხეული“, - მიიჩნევს მათიკაშვილი.