შალვა პაპუაშვილი ყოფილი თანაგუნდელების დაკავებებზე: ბიძინა ივანიშვილმა თავისი წუხილი და იმედგაცრუება გამოხატა იმასთან დაკავშირებით, რაც რა თქმა უნდა, გუნდისთვისაც ძალიან დიდი წუხილია, რომ მისი ყოფილი ლიდერები სისხლის სამართლებრივ პასუხისგებაში არიან მიცემული. ღარიბაშვილთან დაკავშირებით კითხვები არ ყოფილა, უბრალოდ ზოგადად იყო ამაზე საუბარი

საქართველოს პარლამენტის თავმჯდომარემ მედიასთან კომენტარი გააკეთა შაბათს გამართული უმრავლესობის სხდომის იმ ნაწილზე, სადაც საუბარი ყოფილი თანამდებობის პირების სისხლის სამართლებრივ საქმეებს შეეხო.

შალვა პაპუაშვილის თქმით, როგორც „ქართული ოცნების“ დამფუძნებელმა და საპატიო თავმჯდომარე ბიძინა ივანიშვილმა, ასევე, გუნდის ყველა წევრმა გამოთქვა საკუთარი გულისწყვეტა და იმედგაცრუება აღნიშნულის გამო.

„ბიძინა ივანიშვილმა ამაზე ისაუბრა და თავისი წუხილი და იმედგაცრუება გამოხატა იმასთან დაკავშირებით, რაც რა თქმა, უნდა გუნდისთვისაც ძალიან დიდი წუხილია, რომ მისი ყოფილი ლიდერები სისხლის სამართლებრივ პასუხისგებაში არიან მიცემული. ღარიბაშვილთან დაკავშირებით კითხვები არ ყოფილა, უბრალოდ ზოგადად იყო ამაზე საუბარი. ბატონი ბიძინა საუბრობდა იმ პერიოდზე, როდესაც მას შეხვედრა არ ჰქონია საპარლამენტო შემადგენლობასთან. გაკეთდა მოკლე შეჯამება რა პროცესები გავიარეთ ამ პერიოდში. ერთ-ერთი მონაკვეთი სწორედ ამას ეხებოდა, რაც უკავშირდება ყოფილი თანამდებობის პირების სისხლის სამართლებრივ პასუხისმგებლობას და თავად ბიძინა ივანიშვილი შეეხო ამ საკითხს“, - განაცხადა შალვა პაპუაშვილმა.

მისი თქმით, უმრავლესობის სხდომაზე ირაკლი ღარიბაშვილის შეწყალებაზე საუბარი არ ყოფილა.

„შანსი ყველას აქვს პრეზიდენტის მხრიდან, ყველა პატიმარს, მაგრამ ამ შეხვედრაზე არ ყოფილა ამ საკითხზე საუბარი. მით უმეტეს ეს არ არის ჩვენი კომპეტენცია. ეს არის პრეზიდენტის კომპენსაცია“, - განაცხადა შალვა პაპუაშვილმა.