ლევან მაჭავარიანი კაია კალასის განცხადებაზე: ჩვენ საქმით გვაქვს დამტკიცებული, რომ უკან ვერ დაგვახევინებენ და მომავალშიც ამას დავამტკიცებთ

ქალბატონმა კალასმა თქვა, რომ მათი სტრატეგიული ინტერესი ვერ ტარდება [საქართველოში], ანუ აგენტურა ვერ მოჰყავთ ხელისუფლებაში. როგორც უნდათ, ისე გააძლიერონ ეს წნეხი, ჩვენ საქმით გვაქვს დამტკიცებული, რომ უკან ვერ დაგვახევინებენ და მომავალშიც ამას დავამტკიცებთ, - განაცხადა გადაცემაში „იმედი Live“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა კაია კალასის განცხადებასთან დაკავშირებით.

მისივე თქმით, ხელისუფლებას ბრიუსელის ყველა პოტენციური სცენარი გათვლილი აქვს.

„იმდენად არათანმიმდევრულები არიან, რომ რას მოიმოქმედებენ, ამის გათვლა რთულია, თუმცა ჩვენ ყველა პოტენციური სცენარი გათვლილი გვაქვს და ყველაფრისთვის მზად ვართ.

იმდენად არათანმიმდევრულები არიან, რომ აშშ-სთან ურთიერთობა აქვთ განადგურებული. ათწლეულების განმავლობაში ყველაზე მჭიდრო პარტნიორი არ ესაუბრება. კაია კალასმა 2 წლის განმავლობაში 1-წუთიანი შეხვედრა ვერ დანიშნა ბატონ მარკო რუბიოსთან. ძალიან სამწუხაროა, რომ ასეთი მმართველი ელიტაა ევროკავშირის სათავეში, ისინი არ ემსახურებიან ევროპელი ხალხის ინტერესებს, ისინი ატარებენ დიფსტეიტის ინტერესებს“, - განაცხადა ლევან მაჭავარიანმა.

ევროკავშირის უმაღლესმა დიპლომატმა კაია კალასმა განაცხადა, რომ საქართველოს მიმართ ევროკავშირის ამჟამინდელი პოლიტიკა არ იძლევა სასურველ შედეგს და ვერ უზრუნველყოფს ცვლილებებისთვის საჭირო წნეხს.