შოთა ხაბარელი სპორტსმენების ბულინგზე: ქაცარავა იმ გუნდის წევრია, რომელმაც ჩვენს საზღვართან ჩაიხადა და ის უმსგავსობა ჩაიდინა. ეს ადამიანი და მართლა ქვეყნის სირცხვილი შალვა ნათელაშვილი გამოდიან და ამბობენ, ბექაური თავის გვარს არცხვენსო - როგორ შეიძლება ბექაურზე ასეთი რამე თქვა?

სპორტის კომიტეტის თავმჯდომარის პირველი მოადგილე შოთა ხაბარელი სპორტსმენების მიმართ ბულინგსა და კრიტიკას პარლამენტის პლენარულ სხდომაზე გამოეხმაურა.

მისი თქმით, მიუღებელია საქართველოს შიდა მტრების მხრიდან სპორტსმენების მიმართ მსგავსი დამოკიდებულება. კერძოდ, ის შეეხო დავით ქაცარავასა და შალვა ნათელაშვილის განცხადებებს, რომლებმაც ოლიმპიურ ჩემპიონ ლაშა ბექაურს პატრიოტიზმი დაუწუნეს და გვარის შემარცხვენელი უწოდეს.

„მინდა გამოვეხმაურო იმ უმსგავსობებს, რომელსაც ჩვენი ქვეყნის მტრები ჩვენი სპორტსმენების მიმართ ახორციელებენ. კერძოდ, ბექაური, რომელიც არის ოლიმპიური ჩემპიონი, 24 წლის ასაკში მან ორჯერ მოიპოვა ოლიმპიური თამაშების ჩემპიონობა და იცით ყველამ კარგად, როგორი დამოკიდებულება აქვს ქვეყნის მიმართ და როგორ უყვარს სამშობლო. გამოდის პიროვნება, გვარად ქაცარავა, ალბათ გახსოვთ, ეს იმ გუნდის წევრია, რომელმაც ჩვენს საზღვართან ჩაიხადა და ის მართლა უმსგავსობა ჩაიდინა. ეს ადამიანი გამოდის და პატრიოტ ადამიანზე, ბექაურზე ამბობს ასეთ სიტყვებს. ასეთი უღირსი ადამიანები გვყავს. კიდევ ერთი ადამიანი, მართლა ქვეყნის სირცხვილი შალვა ნათელაშვილი ამბობს, რომ ის თავის გვარს არცხვენსო. ბექაური თურმე არცხვენს თავის გვარს. როგორ შეიძლება ბექაურზე ასეთი რამე თქვა? იმიტომ გამოდის, რომ ბექაური მართლა უყვარს ჩვენს ხალხს და მართლა გმირია. არამარტო ბექაური, ყველა ჩვენი ლეგენდარული სპორტსმენი. გამოდიან და აი ასეთი ეპითეტებით ამკობენ ჩვენს სპორტსმენებს. და ნათელაშვილი მართლა ქვეყნის შემარცხვენელია. ჯემალ ნათელაშვილი ჩემი პირადი მწვრთნელი იყო. აი, იმას არცხვენს და მთელ გვარს არცხვენს, იმიტომ, რომ ის თავისი ამ მაიმუნობით და მასხარაობით ბექაურზე ასეთ რამეს ლაპარაკობს. ამიტომ მე მინდა კიდევ აქედან მივმართო ჩვენს სპორტსმენებს, დიდება მათ მოქმედებას, გმირობაა მათი მოქმედება და ასე წარმატებით გამოვლენ, მე დარწმუნებული ვარ, ქვეყნისათვის სასახელოდ“, - განაცხადა შოთა ხაბარელმა.