გურამ მაჭარაშვილი: ამ შუალედურმა არჩევნებმა კიდევ ერთხელ დაადასტურა ის, რომ, სამწუხაროდ, საქართველოში ე.წ. ნაცსექტა და ნაცფილიალები იმართებიან უცხოეთიდან

ამ შუალედურმა არჩევნებმა კიდევ ერთხელ დაადასტურა ის, რომ, სამწუხაროდ, საქართველოში ე.წ. ნაცსექტა და ნაცფილიალები იმართებიან უცხოეთიდან, - განაცხადა გურამ მაჭარაშვილმა. პარტია „ხალხის ძალის“ აღმასრულებელი მდივანი მიიჩნევს, რომ არჩევნებმა მშვიდად ჩაიარა, რადგან ოპოზიციას უცხოეთიდან პროცესის რადიკალიზაციის შესახებ დავალება არ მიუღია.

„აი ამ შუალედურ არჩევნებში, 4 ოლქში როდესაც არ იყო დავალება უცხოეთიდან, როგორც ჩანს, არ ჩათვალეს საჭიროდ, არანაირი ექსცესები არ ყოფილა, არანაირი ძალადობა, მოწოდებები არ ყოფილა“, - ახადებს მაჭარაშვილი.

ცენტრალური საარჩევნო კომისიის თავმჯდომარის გიორგი კალანდარიშვილის განცხადებით, არჩევნები მშვიდ, ორგანიზებულ. უსაფრთხო და კონკურენტულ საარჩევნო გარემოში, სადაც ამომრჩეველს ჰქონდა შესაძლებლობა, საკუთარი არჩევანი თავისუფლად დაეფიქსირებინა. ამასთან, ცესკოს თავმჯდომარის თქმით, „ამ არჩევნებმა, ისევე როგორც წინა არჩევნებმა აჩვენა ის, რომ როდესაც პროცესთან მიმართებით არის ნაკლები ინტერესი ამ არჩევნების არშემდგარად გამოსაცხადებლად, გასაშავებლად და დისკრედიტაციისთვის გამოსაყენებლად, იმთავითვე ნათელია ყველაფერი და იმთავითვე კითხვის ნიშნები არ არსებობს“.

ცესკომ ვანის, წალკის, დმანისისა და ახმეტის მუნიციპალიტეტების 3 ოქტომბერს გამართული, საკრებულოების შუალედური არჩევნების შედეგების წინასწარი მონაცემები გამოაქვეყნა - ოთხივე მუნიციპალიტეტში „ქართული ოცნების“ კანდიდატები ლიდერობენ.