ბაჩო ოდიშარია „ქართული ოცნების“ ყოფილ თანაგუნდელებზე: ადამიანი, რომელზეც ფიქრობდი, რომ იყო თანამებრძოლი, ღირებულებებზე არსებობდა თანხმობა, როდესაც ასე იცვლის თავის ცნობიერებას, გამოდის, რომ ან დასაწყისშივე გატყუებდა და მისი რეალური სახე არ ვიცოდით, ან გამოდის, რომ მას თავისი პირადი, მერკანტილური მიზნებიდან გამომდინარე შეუძლია, რომ ასეთი ორსახოვნება გამოაჩინოს

კინომცოდნე ბაჩო ოდიშარიამ „დღის ქრონიკაში“ „ქართული ოცნების“ ყოფილ თანაგუნდელებზე ილაპარაკა.

მისი თქმით, როდესაც გუნდის წევრი რადიკალურად იცვლის პოზიციას, სავარაუდოა, რომ ის ან თავიდანვე იტყუებოდა, ან მოგვიანებით, საკუთარი მერკანტილური მიზნებისთვის წავიდა ღალატზე.

„ყველაზე ტრაგიკული ნაწილია ამ პროცესების. იმიტომ, რომ ადამიანი, რომელზეც ფიქრობდი, რომ იყო თანაგუნდელი, თანამებრძოლი, იდეალების მატარებელი, ღირებულებებზე არსებობდა თანხმობა, რომელიც ჩვენი ქვეყნისთვის არის მნიშვნელოვანი, როდესაც ასე იცვლის თავის ცნობიერებას, გამოდის, რომ ან დასაწყისშივე გატყუებდა და მისი რეალური სახე არ ვიცოდით, ან გამოდის, რომ მას თავისი პირადი, მერკანტილური მიზნებიდან გამომდინარე შეუძლია, რომ ასეთი ორსახოვნება გამოაჩინოს.

შეუძლებელია, როდესაც წარმოადგენ კონკრეტულ პოლიტიკურ გუნდს, როდესაც შენ იზიარებ ყველა იდეას, რომელიც 2012 წლის პირველ ოქტომბერს მოსდევს თან, შემდეგ, როდესაც შენს გუნდს დატოვებ საკუთარი ნებით თუ საერთო გადაწყვეტილებით, მეორე დღესვე დაჯდე მტერ ბანაკში და მათ სასარგებლო ნარატივს მოერგო და დაიწყო ლაპარაკი, რომ თურმე შენი ადრინდელი პერიოდის თანაგუნდელები, ის პოლიტიკური ერთეული, რომელზეც შენც ამბობდი, რომ არის ქვეყნის გადარჩენა, ყოფილა ყველზე ცუდი, მანკიერი და ახლა ცვლილებებია საჭირო. ასეთ ადამიანზე მსგავსი საუბარი მეტყველებს საუკეთესოდ იმიტომ, რომ ზუსტად ხვდები, როგორ ფსიქოტიპთან გაქვს საქმე“, - განაცხადა ბაჩო ოდიშარიამ.