ნინო წილოსანი ბერა ივანიშვილის გადაწყვეტილებაზე: თითქოს ნორმად აქციეს, რომ ბიძინა ივანიშვილის ოჯახის მიმართ ათას სიცრუესა და სიბინძურეს ავრცელებენ, თან მათ სტილში, სასაცილოდ და უგემოვნოდ დადგმული სცენებით

ბერა ივანიშვილის გადაწყვეტილებას, რომ ამ აღვირახსნილ სიცრუესა და დეზინფორმაციას უპასუხოს სამართლებრივად ექნება პრეცედენტული ხარისიათი, - განაცხადა პარლამენტის ვიცე-სპიკერმა ნინო წილოსანმა ბერა ივანიშვილის გადაწყვეტილების შესახებ საუბრისას, რომელმაც გუშინ დაწერა, რომ მის წინააღმდეგ მიმართული ცილისმწაბელური კამპანიის გამო სამართლებრივ დავას იწყებს.

წილოსანი თქმით, გარკვეულმა ძალებმა თითქოს ნორმად აქციეს ბიძინა ივანიშვილის ოჯახის მიმართ სიცრუისა და სიბინძურის გავრცელება.

„თითქოს ნორმად აქციეს, რომ ბიძინა ივანიშვილის ოჯახის მიმართ ათას სიცრუესა და სიბინძურეს ავრცელებენ, თან მათ სტილში, სასაცილოდ და უგემოვნოდ დადგმული სცენებით. ფაქტია, რომ ამ ყველაფერს ჩვენი საზოგადოების უდიდესი უმრავლესობა არ იჯერებს, თუმცა ისიც ფაქტია, რომ ამ კამპანიას აქვს მიზანმიმართული და ორგანიზებული ხასიათი. ამიტომ ვფიქრობ, რომ ბერას გადაწყვეტილებას ამ ყველაფერის სამართლებრივ ჭრილში გადაყვანის შესახებ ნამდვილად ექნება პრეცედენტული ხასიათი“, - განაცხადა ნინო წილოსანმა.

„ქართული ოცნების” დამფუძნებლის და საპატიო თავმჯდომარის ვაჟი, ბერა ივანიშვილი სამართლებრივ დავას იწყებს. ამის შესახებ მან სოციალურ ქსელში დაწერა, რომელშიც აღნიშნა, რომ კონკრეტული მედიასაშუალებებისა და პირების წინააღმდეგ სასამართლოში ჩივილს გეგმავს.