„თითოეული პოლიტპატიმრის გადასაწყვეტია, მოითხოვს თუ არა შეწყალებას“ - აქციების დროს დაკავებული მსჯავრდებულების მიერ პრეზიდენტის მიმართ შეწყალების თხოვნით მიმართვას ოპოზიციონერი პოლიტიკოსები ეხმაურებიან

მარიამობის დღესასწაულზე პრეზიდენტის მიერ შეწყალებული 226 მსჯავრდებულიდან 9, აქციების დროს დაკავებულია. დაკავებულთა მხრიდან დანაშაულის აღიარებასა და პრეზიდენტის მიმართ შეწყალების თხოვნით მიმართვას, შეფასებები მოჰყვა ოპოზიციონერი პოლიტიკოსების მხრიდან.

სოციალურ ქსელში პოსტი გამოაქვეყნა „ფედერალისტური პარტიის“ თბილისის ორგანიზაციის თავმჯდომარემ თამარ ჩერგოლეიშვილმა, რომელმაც დაწერა, რომ თითოეული პოლიტპატიმრის გადასაწყვეტია, მოითხოვს თუ არა შეწყალებას.

„მეგობრებო, აქციების დროს დაჭერილ პოლიტპატიმრებს, ყველას გაუშვებენ, ვინც შეწყალებას მოითხოვს. თვეებია მაგას იხვეწება რეჟიმი, მოინანიეთ, რომ გაგიშვათო.

ცხადია, თითოეული პოლიტპატიმრის გადასაწყვეტია, მოითხოვს თუ არა შეწყალებას და მათ განსჯას არ ვაპირებ - უბრალოდ ფაქტს აღვნიშნავ“ - წერს თამარ ჩერგოლეიშვილი.

„ჩვენ ვერ ვიქნებით მორალური მსაჯულები ჩვენი გმირი მოქალაქეების. ერთადერთი, რაც შემიძლია გითხრათ, არის ის, რომ მიხარია მათი გათავისუფლება“ - განუცხადა ჟურნალისტებს „ნაციონალური მოძრაობის“ წევრმა ირაკლი ფავლენიშვილმა.

საქართველოს პრეზიდენტის მიერ შეწყალებულებმა, მათ შორის აქციებზე დაკავებულმა რამდენიმე ადამიანმა, საპატიმროები გუშინ დატოვა.