ომის ვეტერანი ჯანდრი უბირია ბარამიძის განცხადებაზე: ვწუხვარ, რომ კიდევ არსებობენ ასეთი ადამიანები, რომლებიც ცდილობენ ყველაფერი გააკეთონ იმისთვის, რომ არიონ ეს ქვეყანა და ხელი შეუშალონ იმ ნელ-ნელა მიმდინარე მშვიდობიან პროცესს, რასაც ჩვენი ქვეყნის გაერთიანება ჰქვია

სამწუხაროა, რომ საქართველოში დაბადებული ადამიანი - ბარამიძე, ასეთ განცხადებას აკეთებს, მაშინ როდესაც არცერთი ასეთი ფაქტი არ ყოფილა, - განაცხადა ომის ვეტერანმა ჯანდრი უბირიამ „ქრონიკასთან“.

მისი თქმით, სამწუხაროა, რომ ზოგიერთი ადამიანი ყველაფერს აკეთებს იმისთვის, რომ ქვეყანა აირიოს.

„ვიღაცის დავალებით შეასრულა ეს, რასაც მოჰყვა აფხაზეთის ე.წ. საგარეო საქმეთა მინისტრის განცხადება, რომ საკითხს ჟენევაში დააყენებს. ვწუხვარ, რომ კიდევ არსებობენ ასეთი ადამიანები, რომლებიც ცდილობენ, ყველაფერი გააკეთონ იმისთვის, რომ არიონ ეს ქვეყანა და ხელი შეუშალონ იმ ნელ-ნელა მიმდინარე მშვიდობიან პროცესს, რასაც ჩვენი ქვეყნის გაერთიანება ჰქვია“, - აღნიშნა უბირიამ.

„ნაციონალური მოძრაობის" ერთ-ერთმა ლიდერმა გიორგი ბარამიძემ განაცხადა, რომ აფხაზეთის ომის დროს ქართულ მხარეს ტყვეთა გაცვლა უჭირდა, რადგან დაკავებულ აფხაზ მებრძოლებს ქართველები ხშირად ადგილზე ხვრეტდნენ.

ბარამიძის ამ განცხადების საფუძველზე გენერალურმა პროკურატურამ, სამშობლოს ღალატისა და საბოტაჟის ბრალდებით გამოძიება დაიწყო.