გურამ დუმბაძე: თვისებრივად შეცვალა სახელმწიფოს მიდგომა, როდესაც მზად ვართ, გადავიხადოთ საბაზრო ღირებულება, ჩვენ ამით მცირე, საშუალო და დიდ ბიზნესებსაც განვითარების საშუალებას ვაძლევთ, გვინდა, გვყავდეს ისეთი დიდი კომპანიებიც, რომლებიც მსხვილ ინფრასტრუქტურულ პროექტებს შეასრულებენ საქართველოში

ყველა რეფორმა, რომელიც დავაინიცირეთ, შემუშავებულია შესაბამისი დარგის ექსპერტების, მშენებელთა ასოციაციის, ბიზნესასოციაციის ჩართულობით, მათი ჯანსაღი ინტერესებისა და საჭიროებების გათვალისწინებით, - განაცხადა საქართველოს მთავრობის ადმინისტრაციის ეფექტიანობის დეპარტამენტის უფროსმა, გურამ დუმბაძემ გადაცემა „ბიზნესპარტნიორში“.

გურამ დუმბაძის განმარტებით, კერძო სექტორის 60 ათასი ეკონომიკური ოპერატორი ასევე აქტიურად იყენებს MRS მოდულს, რომელიც ინტერაქციის შესაძლებლობასაც იძლევა.

„დღეს თვისებრივად შეცვალა სახელმწიფოს მიდგომა, როდესაც უკვე მზად ვართ, გადავიხადოთ საბაზრო ღირებულება, ფაქტობრივად, ჩვენ ამით ვამბობთ, რომ მცირე, საშუალო და დიდ ბიზნესებსაც განვითარების საშუალებას ვაძლევთ. ჩვენ გვინდა, გვყავდეს ისეთი დიდი კომპანიებიც, რომლებიც დიდ ინფრასტრუქტურულ პროექტებს შეასრულებენ საქართველოში. რაც შეეხება მეორე ნაწილს, ტექნიკურ პარამეტრებს, საქონლისა და მომსახურების ნაწილს და გამოცხადებას, ეს დიფერენცირებულია შესაბამისი სპეციფიკის მიხედვით, ეს იქნება საგზაო სამუშაო, შენობა-ნაგებობებით თუ ა.შ. მაგრამ ჩვენ ასევე გვაქვს დამატებითი კომპონენტი კერძო სექტორისთვის და აქტიურად იყენებს 60 ათასი ეკონომიკური ოპერატორი, ეს არის MRS მოდული. ნებისმიერ ტექნიკურ დავალებაზე, რომელსაც შევიმუშავებთ და ვამბობთ ბაზრის კვლევაზე, რომ ამით ვაპირებ, გამოვიდე ბაზარზე, შეუძლიათ მოგვწერონ, გვითხრან შენიშვნა, რას ვერ აკმაყოფილებენ, სად არის გაუმჯობესების საშუალება. შემსყიდველი ვალდებულია, დაამუშაოს, გაითვალისწინოს და საუკეთესო ვერსია გამოიტანოს ბაზრისთვის, რათა უზრუნველვყოთ მაქსიმალური კონკურენცია“, - განაცხადა გურამ დუმბაძემ.