დავით მათიკაშვილი აშშ-ის სახელმწიფო დეპარტამენტის განცხადებაზე: ბურთი არის აშშ-ს მოედანზე, ჩვენ ველოდებით ამ სიტყვების რეალურ ცხოვრებაში გადაზრდას

საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა აშშ-ის სახელმწიფო დეპარტამენტის განცხადების ის ნაწილი შეაფასა, რომელიც საქართველო-ამერიკის ურთიერთობების აღდგენას უკავშირდება.

როგორც მათიკაშვილმა აღნიშნა, ეს ის არის, რასაც საქართველოს ხელისუფლება და საქართველოს მოქალაქეები დიდი ხანია ელოდებიან.

„სამართლიანი და ღირსეული ურთიერთდამოკიდებულება გახლავთ ის აუცილებელი წინაპირობა აშშ-სა და საქართველოს შორის ურთიერთობების გადატვირთვისთვის, რაც ჩვენ აქამდე არაერთგზის გაგვიცხადებია. მოსაწონია, როდესაც სახელმწიფო დეპარტამენტის წარმომადგენლების მხრიდან, რომლებიც საქართველოში იმყოფებოდნენ, მათ მიერ გაკეთებულ განცხადებებში სწორედ ეს ლაიტმოტივი ჟღერდება. ახლა ბურთი არის აშშ-ს მოედანზე, ჩვენ ველოდებით ამ სიტყვების გადაზრდას რეალურ ცხოვრებაში“, - აღნიშნა დავით მათიკაშვილმა.

„ფუნქციონალური დემოკრატია საჭიროებს პოლიტიკურ ოპოზიციას, რომელიც სახელმწიფო ინსტიტუტებთან ურთიერთობს იმ მოქალაქეების ინტერესების წარმოსაჩენად, რომლებმაც მას ხმა მისცეს“ - აშშ-ის საელჩო სახელმწიფო დეპარტამენტის დელეგაციის განცხადებას ავრცელებს.