შალვა პაპუაშვილი: ქართული არაფერი მოსწონს ამ ხალხს, ვერანაირად ინსპირაციას ვერ პოულობენ ქართული პროტესტის ისტორიაში და ცდილობენ, რომ უცხოელების მარიონეტები იყვნენ
პოლიტიკა

შალვა პაპუაშვილი
ფოტო: საქართველოს პარლამენტი
ქართული არაფერი მოსწონს ამ ხალხს, ვერანაირად ინსპირაციას ვერ პოულობენ ქართული პროტესტის ისტორიაში და ცდილობენ, რომ უცხოელების მარიონეტები იყვნენ, - განაცხადა პარლამენტის თავმჯდომარე შალვა პაპუაშვილმა.
ის გამოეხმაურა „ქრონიკის“ ინფორმაციას, რომ ოპოზიციას რევოლუციურ სცენარს ამჯერად „პრაღის სამოქალაქო საზოგადოების ცენტრის“ ერთ-ერთი ლიდერი იგორ ბლაჟევიჩი უწერს.
„ბლაჟევიჩის დაჯგუფება პირველი არ არის, მანამდე აკერმანის დაჯგუფება იყო. არ ვიცი, ქართული არაფერი მოსწონს ამ ხალხს, ვერანაირად ინსპირაციას ვერ პოულობენ ქართული პროტესტის ისტორიაში და ცდილობენ, რომ უცხოელების მარიონეტები იყვნენ. ჩემთვის საკმაოდ ნათელია, რომ ეს არის ჩვეულებრივი სპეცსამსახურების პროექტი და იცით თქვენ, რომ სუს-ი აკვირდება ამ პროცესს. ასე რომ ამ ყველაფერზე, დარწმუნებული ვარ, ინფორმირებულია სპეცსამსახური და შესაბამის ზომებსაც იღებს. ეს არის ჩვეულებრივი სპეცსამსახურების მიერ დაგეგმილი ოპერაცია საქართველოს მიმართ, როგორც ეს იყო აკერმანის შემთხვევაში, ახლა ბლაჟევიჩი და სხვები. კარგია, რომ არ იმალება ასეთი რაღაც, ესეც გაკვეთილი უნდა იყოს სხვა ქვეყნების სპეცსამსახურებისთვის, რომ ასეთი მავნებლობა საქართველოში არ იმალება და არც დაიმალება. პატარა ქვეყანაა, ყველა ყველას იცნობს და ნურავის ექნება იმედი, რომ ფარულად შეძლებენ ქვეყნისთვის ძირის გამოთხრას. მთავარი პრობლემა ისაა, რომ ეს ყველაფერი ევროკავშირის ტერიტორიიდან ხდება და სხვა ქვეყნების სუვერენიტეტზე თავდასხმის წყაროდ იქცა",- განაცხადა პაპუაშვილმა.





