ნიკოლოზ სამხარაძე ნიკა ობოლაძეს: თქვენ თუ ამბობთ, რომ ჩვენ არ გვთხოვდნენ სანქციების დაწესებას [რუსეთისთვის], ეს დიდი ტყუილია, გვთხოვდნენ 2022 წელს და გვთხოვენ 2026 წელსაც

თქვენ თუ ამბობთ, რომ ჩვენ არ გვთხოვდნენ სანქციების დაწესებას [რუსეთისთვის], ეს დიდი ტყუილია, გვთხოვდნენ 2022 წელს და გვთხოვენ 2026 წელსაც, - განაცხადა ტელეკომპანია „იმედის“ გადაცემაში „ღია ეთერი-დებატები“ საგარეო ურთიერთობათა საპარლამენტო კომიტეტის თავმჯდომარე ნიკოლოზ სამხარაძემ ნიკა ობოლაძის განცხადების პასუხად.

„სანქციების საკითხი რომ განვმარტოთ, ვინ ითხოვდა და ვინ არა. ვინ ითხოვდა და დღემდე ვინ ითხოვს, დოკუმენტებშია ჩამოთვლილი, მათ შორის ყველაზე ბოლოს ევროპული საბჭოს დოკუმენტშიც კი არის ნახსენები, რომ საქართველომ სანქციები უნდა დაუწესოს რუსეთს იმიტომ, რომ იყოს სრულ თანხვედრაში ევროკავშირის საგარეო და უსაფრთხოების პოლიტიკასთან. ამიტომ თქვენ თუ ამბობთ, რომ ჩვენ არ გვთხოვდნენ სანქციების დაწესებას [რუსეთისთვის], ეს დიდი ტყუილია - გვთხოვდნენ 2022 წელს და გვთხოვენ 2026 წელსაც“, - განაცხადა სამხარაძემ.

სამხარაძემ განმარტა საერთაშორისო სანქციებსა და ორმხრივ სანქციებს შორის სხვაობის მნიშვნელობაც.

„საერთაშორისო სანქციებზე ჯერ კიდევ 25 თებერვალს [2022 წლის] განვაცხადეთ, რომ საქართველო არ იქნება გამოყენებული, როგორც შავი ხვრელი საერთაშორისო სანქციების გვერდის ავლისთვის, ყულევის თემა სწორედ ამ პრიზმაში უნდა განვიხილოთ. რამდენი სანქციების კოორდინატორი იყო ჩამოსული, გინდ ამერიკელი, გინდ ბრიტანელი და გინდ ევროპელი, ყველამ აღნიშნა, რომ საქართველო უკეთ ასრულებს სანქციების გვერდის ავლის მექანიზმს, ვიდრე ევროკავშირის ზოგიერთი ქვეყანა.

რაც შეეხება ორმხრივ სანქციებს, ორმხრივი სანქციის დაწესება არის პოლიტიკური აქტი და როდესაც შენ რუსეთს ეუბნები, რომ მე შენ გიწესებ ეკონომიკურ ემბარგოს, ეს არ ნიშნავს იმას, რომ შენ ეუბნები: მე შენ ვაშლს და ატამს აღარ მოგყიდი. ეს არის პოლიტიკური გადაწყვეტილება და ამით შენ ესკალაციაში შედიხარ რუსეთის ფედერაციასთან“, - განაცხადა ნიკოლოზ სამხარაძემ.