შალვა პაპუაშვილი: გამოდის ევროკავშირის ელჩი და ბედავს, რომ ქართველებს, რომლებსაც ჩვენი გამოწვევები გვაქვს, ცხვირაბზუებული გვეუბნება, რუსი ტურისტი არ შემოუშვა, დამშეული იყავი, ღვინო არ გაყიდო

გამოდის ევროკავშირის ელჩი და ბედავს, რომ ქართველებს, რომლებსაც ჩვენი გამოწვევები გვაქვს, ცხვირაბზუებული გვეუბნება, რუსი ტურისტი არ შემოუშვა, დამშეული იყავი, ღვინო არ გაყიდო, - განაცხადა პარლამენტის თავმჯდომარემ, შალვა პაპუაშვილმა.

როგორც პაპუაშვილმა აღნიშნა, ბრიუსელი დღეს არა მხოლოდ სხვების, არამედ საკუთარი ხალხის ბედსაც ანგრევს.

„ვინ ეკითხება ევროკავშირის ელჩს, რომ აქ გველაპარაკება ამ ტონით, თვითონ შეწყვიტონ რუსეთის დაფინანსება. გვერდით ეჯდა ელჩი ბალტიის ერთ-ერთი ქვეყნიდან, რომელსაც ჩვენზე მეტი ღვინო გააქვს რუსეთში. ასეთი ფარისევლობაა დღეს ევროკავშირი.

ბრიუსელი დღეს არის ღირებულებებისგან დაცლილი ბიუროკრატების თავყრილობა, რომელსაც ერთადერთი, რაც შეუძლია, არის სხვების დაზიანება. მათ არ აქვთ არანაირი უნარი, ძალა, შემოქმედებითი მიდგომა რაიმეს მიმართ. ერთადერთი, რასაც დღეს ბრიუსელი აკეთებს, არის ნგრევა. რაც მთავარია, ანგრევს სხვების და საკუთარი ხალხის ბედსაც. ამიტომაც არის რომ ევროპელმა ხალხმა ხმა აიმაღლა ბრიუსელისა და მათი მარიონეტების წინააღმდეგ“, - აღნიშნა შალვა პაპუაშვილმა.