შალვა პაპუაშვილი: ყველა გადაწყვეტილება, რასაც ჩვენ ვაკვირდებით, არის ერთად ერთი - ის ამხელს თავად ბრიუსელს, მის ბიუროკრატიას, იმ პოლიტიკურ წრეებს, რომლებიც დღეს სრულად აცდენილი არიან საკუთარი მოსახლეობის ინტერესებს

ყველა გადაწყვეტილება, რასაც ჩვენ ვაკვირდებით, არის ერთად ერთი - ის ამხელს თავად ბრიუსელს, მის ბიუროკრატიას, იმ პოლიტიკურ წრეებს, რომლებიც დღეს სრულად აცდენილი არიან საკუთარი მოსახლეობის ინტერესებს, - განაცხადა საქართველოს პარლამენტის თავმჯდომარემ, შალვა პაპუაშვილმა ჟურნალისტებთან საუბრისას, კითხვაზე ვიზალიბერალზაციაზე რა გადაწყვეტილებას ელოდებიან, შეუჩერდება თუ არა საქართველოს, ან ხომ არ ელოდებიან, რომ სანქციები მხოლოდ თანამდებობის პირებს დაუწესდეთ.

პაპუაშვილის თქმით, დღეს ევროპა იმართება უმცირესობების მთავრობებით, რომელთაც არ აქვთ ხალხის მხარდაჭერა.

ჩვენ რასაც ვაკვირდებით ბოლო პერიოდში, ჩვენს შემდეგ ახლა უკვე აშშ-მა ამხილა ევროკავშირის ღირებულებითი დაღმა სვლა, მისი დემოკრატიის უკუსვლა. ამ ყველაფრის შემდეგ, ყველა გადაწყვეტილება, რასაც ჩვენ ვაკვირდებით, არის ერთად ერთი - ის ამხელს თავად ბრიუსელს, მის ბიუროკრატიას, იმ პოლიტიკურ წრეებს, რომლებიც დღეს სრულად აცდენილი არიან საკუთარი მოსახლეობის ინტერესებს.

დღეს ევროპა იმართება უმცირესობების მთავრობებით, რომელსაც არ აქვს ხალხის მხარდაჭერა და ეს სისტემაა, რომელიც უნდოდათ, მათ შორის საქართველოსთვის თავს მოეხვიათ. ნებისმიერი გადაწყვეტილება თავად ბრიუსელის მხილება იქნება. ასე, რომ ამას დიდი გავლენა იმაზე ვერ ექნება, ჩვენ რა პოლიტიკა უნდა ვაწარმოოთ“, - განაცხადა პაპუაშვილმა.

მან გაიხსენა ევროსაბჭოზე დანიის მიერ ინიცირებული საკითხი, რომელიც რუსეთისა და ბელორუსიის სანქცირების თემას ეხებოდა. პაპუაშვილმა აღნიშნა, რომ ეს საკითხი ჩავარდა.

„მას შემდეგ, რაც ევროსაბჭოზე ჩავარდა საქართველოზე განცხადება, რომ დანიამ უკვე ერთპიროვნულად გამოაქვეყნა ეს ტექსტი, მასში მთავარი პასაჟი რაც იყო, ვიხილეთ უკვე დოკუმენტირებულად ამ ტექსტში მოთხოვნა, რომ დავუწესოთ სანქციები რუსეთს. ნახეთ ჩანაწერი, რომ მოითხოვდნენ ამ პროექტით, რომელიც ჩავარდა ევროპულ საბჭოზე, მაგრამ დანიამ მაინც გამოაქვეყნა და როგორც ჩანს, აშკარად მისი პოზიციაა, ითხოვენ პირდაპირ სრულ თანხვედრას რუსეთისა და ბელორუსის მიმართ დაწესებულ შეზღუდვებზე. სრული თანხვედრა ნიშნავს ზუსტად სანქციების დაწესებას რუსეთისთვის და ბელორუსისთვის. ამას სთხოვს დღეს ბრიუსელი, ევროკავშირი მოითხოვს საქართველოსგან, რომ სანქციები დავუწესოთ რუსეთს, სანქციები დავუწესოთ ბელორუსს. ამაზე ვსაუბრობთ სამი წელია. ზუსტად ეს იყო დახურულ კარს მიღმა, რასაც ითხოვდნენ-ხოლმე, სხვა ყველაფერთან ერთად და გარეთ ამაზე არ საუბრობდნენ. გასულ წელს პირველად ევროპარლამენტმა რეზოლუციაში ჩაწერა, ახლა დანიის განცხადებაში ვნახეთ ეს ჩანაწერი. ეს არის საქართველოს პირდაპირ ბიძგება, რომ ესკალაციაში შევიდეს რუსეთთან, ეს არის პირდაპირ ბიძგება, რომ ამ ესკალაციაში როგორც ეკონომიკურ, ისე პოლიტიკურ ესკალაციაში შევიდეთ და ამ ესკალაციის ბოლოს რომ არის სამხედრო დაპირისპირება, ამ განცხადების ავტორები ან მიამიტები არიან და ვერ ხვდებიან, ან მავნებლები და ძალით გვიბიძგებენ ისეთი ესკალაციისკენ, რომლის ბოლოშიც არის ომი“, - აღნიშნა პაპუაშვილმა.

ევროკავშირის წარმომადგენლობა საქართველოში ევროკავშირის საბჭოს თავმჯდომარეობის მიერ გაფართოებასთან დაკავშირებით გამოტანილი დასკვნებიდან ამონარიდებს აქვეყნებს. საქართველოზე საუბრისას, ანგარიშის ერთ-ერთ მონაკვეთში საქართველოს მიერ რუსეთისა და ბელარუსისთვის სანქციების დაწესებისკენ მოწოდებაა დაფიქსირებული.