შოთა ბერეკაშვილი ინდოეთში გამართულ შეხვედრებზე: ხაზი გაესვა ისეთ ეკონომიკურ სექტორებში თანამშრომლობას, როგორიც არის ლოგისტიკა, ტრანსპორტი, ენერგეტიკა - ვისაუბრეთ თავისუფალი ვაჭრობის ხელშეკრულების გაფორმების შესაძლებლობებზე

ეკონომიკური პოლიტიკის საპარლამენტო კომიტეტის თავმჯდომარემ შოთა ბერეკაშვილმა მედიასთან იმ თემებზე ისაუბრა, რომლებიც ინდოეთში ვიზიტის ფარგლებში გამართულ შეხვედრებზე განიხილეს. დეპუტატის თქმით, განსახილველ საკითხებს შორის იყო ეკონომიკის სხვადასხვა სექტორში თანამშრომლობა.

„ხაზი გაესვა ისეთ ეკონომიკურ სექტორებში თანამშრომლობას, როგორიც არის ლოგისტიკა, ტრანსპორტი, ენერგეტიკა. ვიმსჯელეთ ტურიზმის მიმართულებით შესაძლებლობებზე, დიდი დაინტერესებაა საქართველოს მიმართ.

ასევე, აღვნიშნეთ საქართველოს მნიშვნელოვანი როლი, როგორც დამაკავშირებელი ხიდისა ორ ეკონომიკურ გიგანტს შორის, როგორებიცაა სამხრეთ-აღმოსავლეთ აზია და ევროკავშირი. რა თქმა უნდა, ვისაუბრეთ ორ ქვეყანას შორის თავისუფალი ვაჭრობის ხელშეკრულების გაფორმების შესაძლებლობებზე და რა ნაბიჯები შეიძლება, გადაიდგას ამ მიმართულებით“, - განაცხადა შოთა ბერეკაშვილმა.

საქართველოს საპარლამენტო დელეგაცია, რომელსაც პარლამენტის თავმჯდომარე შალვა პაპუაშვილი ხელმძღვანელობს, ოფიციალური ვიზიტით ინდოეთში იმყოფება. საპარლამენტო დელეგაციაში შედიან: საგარეო ურთიერთობათა კომიტეტის თავმჯდომარე ნიკოლოზ სამხარაძე, ინდოეთთან მეგობრობის ჯგუფის ხელმძღვანელი ვასილ ჩიგოგიძე, ეკონომიკური პოლიტიკის კომიტეტის თავმჯდომარე შოთა ბერეკაშვილი, ფრაქცია „ქართული ოცნების“ თავმჯდომარის მოადგილე გენრიეტა წიწავა.