ნინო ლაცაბიძე „იგლ ჰილსის“ პროექტის მოწინააღმდეგეებზე: საწყენია, როდესაც ასე საუბრობენ კრწანისის დიდ პროექტზე, რომელსაც დიდი ეკონომიკური გავლენა ექნება ჩვენს ქალაქსა და ქვეყანაზე. საუბრობენ ეკოლოგიის სახელით, თითქოს რაღაც ზიანდება

რუსთავის მუნიციპალიტეტის მერი ნინო ლაცაბიძე დარწმუნებულია, რომ რუსთავის ჭალის ტყე ჰარმონიას შექმნის მულტიფუნქციურ კომპლექსთან, რომელსაც „იგლ ჰილსი“ კრწანისის ტყის ტერიტორიაზე განახორციელებს. ამის შესახებ მან „იმედის კვირასთან“ ისაუბრა.

„დიდი ეკოლოგიური პოტენციალის მატარებელია ეს პროექტი და ნამდვილად საწყენია, როდესაც საუბრობენ კრწანისის იმ დიდ პროექტზე, რომელსაც ძალიან დიდი ეკონომიკური გავლენა ექნება ჩვენს ქალაქსა და ქვეყანაზე. საუბრობენ ამას ეკოლოგიის სახელით, რომ თითქოს რაღაც ზიანდება და არ საუბრობენ 320 ჰექტარზე, რომელიც უშუალოდ პრემიერის ჩართულობით, მისი დავალებით, გარემოს დაცვის სამინისტროსთან, გარემოს დაცვის კომიტეტთან ერთად რუსთავის მერიამ შეიმუშავა და დღეს უმნიშვნელოვანესი პროცესი მიდის ამ ტერიტორიის აღდგენის, რომ იყოს ერთ-ერთი გამორჩეული მწვანე სივრცე“, - განაცხადა რუსთავის მერმა.