ბოჭორიშვილი: დიდი ხანია ვაკვირდებით, როგორ ხდება ევროინტეგრაციასთან დაკავშირებული საკითხების ინსტრუმენტად გამოყენება საქართველოსთან მიმართებაში. ასე იყო კანდიდატის სტატუსის შემთხვევაში და ასეა ვიზალიბერალიზაციის შემთხვევაშიც

დიდი ხანია, ვაკვირდებით, თუ როგორ ხდება ევროინტეგრაციასთან დაკავშირებული საკითხების ინსტრუმენტად გამოყენება საქართველოსთან მიმართებაში. ასე იყო კანდიდატის სტატუსის შემთხვევაში და ასე არის ვიზალიბერალიზაციის შემთხვევაშიც, - განაცხადა საქართველოს საგარეო საქმეთა მინისტრმა, მაკა ბოჭორიშვილმა.

„ამას კარგად ხედავს და კარგად აფასებს ქართველი ხალხი, სწორედ ამიტომაც ვიღებთ იმ შედეგებს, რა შედეგებსაც ვიღებთ არჩევნებზე. ცდილობენ [ქართული ოპოზიცია და ევრობიუროკრატია] ყველაფრის ფასად დააზიანონ ჩვენი ქვეყნის ინტერესები, ყველაფრის ფასად იბრძოლონ საქართველოს სახელმწიფოს, ქართველი ხალხის წინააღმდეგ და თუკი ეს საერთაშორისო ასპარეზზე შესაძლებელია, ისინი ამისთვის ყველაფერს აკეთებენ“, - აღნიშნა მაკა ბოჭორიშვილმა.

მედიაში გავრცელებული ინფორმაციით, ოპოზიცია საქართველოსთვის ვიზალიბერალიზაციის შეჩერებას ბრიუსელში დაჟინებით ითხოვს - რადიკალური ოპოზიცია ნოემბრის ბოლოსთვის უცხოელ მოკავშირეებს საქართველოსთვის ვიზალიბერალიზაციის შეჩერებას სთხოვს და ბრიუსელში მაღალჩინოსნებს არწმუნებს, რომ მხოლოდ ხელისუფლების წარმომადგენლებზე ზეწოლა შედეგს არ მოიტანს.