გიორგი ვოლსკი: „ქართული ოცნება“ უზრუნველყოფს კონსერვატიზმის იმ დონეს, რომელიც ქვეყნის კულტურულ მემკვიდრეობას და თვითმყოფადობას შეესაბამება

გიორგი ვოლსკი ევროკავშირის 2026-2030 წლების ლგბტქ+ ახალ სტრატეგიას ეხმიანება, რომელიც არასრულწლოვანებს სქესის შეცვლის სამართლებრივ პროცედურებს უმარტივებს. პარლამენტის პირველი ვიცე-სპიკერი ასევე რეფერენდუმის ჩატარებასთან დაკავშირებით „ნეიტრალური საქართველოს“ ინიციატივას გამოეხმაურა და აღნიშნა, რომ საქართველო საგარეო კურსს არ იცვლის.

„საკითხი არის ძალიან სერიოზული და სწორედ ის ადამიანები გამოვიდნენ და გაგვცენ ახლა პასუხი, რომლებიც ამბობენ, თითქოსდა ჩვენ ვავრცელებდით ტყუილებს ლგბტ პროპაგანდის თემასთან დაკავშირებით და ზოგადად ეს სექსუალური აღზრდის თემა არის მოგონილი და ევროპას მსგავსი არაფერი ახასიათებს. ეს იმას არ ნიშნავს, რომ ჩვენ საგარეო კურსს ვიცვლით. რაც შეეხება რეფერენდუმს, რასაკვირველია, სერიოზული თემაა, ამასთან დაკავშირებით დაფიქრება გვმართებს. მაგრამ ერთიც გვახსოვდეს - „ქართული ოცნება“ უზრუნველყოფს კონსერვატიზმის იმ დონეს, რომელიც შეესაბამება მის კულტურულ მემკვიდრეობას და თვითმყოფადობას“, - აღნიშნა ვოლსკიმ.

ევროკავშირის ლგბტქ+ მხარდამჭერ სტრატეგიას ხელი მოაწერა ევროკომისიის პრეზიდენტმა ურსულა ფონ დერ ლაიენმა. ბრიუსელი კი წევრ სახელმწიფოებს, დოკუმენტის წინააღმდეგ წასვლის შემთხვევაში, დაფინანსების შეჩერებით დაემუქრა.