მიხეილ ჯანელიძე ოკუპირებული აფხაზეთის დეფაქტო წარმომადგენლების ბრიუსელში ვიზიტს გამოეხმაურა

საქართველოს საგარეო საქმეთა მინისტრი მიხეილ ჯანელიძე ოკუპირებული აფხაზეთის დე-ფაქტო დელეგაციის ბრიუსელში ვიზიტს გამოეხმაურა. ჯანელიძე ამბობს, რომ ეს იყო არა დელეგაციის, არამედ კერძო პირთა ვიზიტი. მინისტრის თქმით, ევროკავშირი არაღიარების პოლიტიკას განაგრძობს.

"ეს არის ფიზიკური პირების ინდივიდუალური მოგზაურობები და შეხვედრები, რომელიც, რა თქმა უნდა, არანაირად არ არის ევროკავშირის და საერთაშოროსო საზოგადოების და არც ერთი ევროპული ქვეყნის პოლიტიკის შესაბამისი. საქართველოს ტერიტორიული მთლიანობა და სუვერენიტეტი არის აღიარებული საერთაშორისო საზოგადოების მიერ. ევროკავშირი მტკიცედ უჭერს მხარს არაღიარების პოლიტიკას. საქართველოს მთავრობა აგრძელებს აქტიურ მუშაობას ამ საკითხზე ყველა პარტნიორ ქვეყანასთან და ორგანიზაციასთან, რათა საერთაშორისო საზოგადოების ჩართულობით მშვიდობიანი გზით მოხდეს კონფლიქტის დარეგულირება და საქართველოს ტერიტორიული მთლიანობის აღდგენა", - განაცხადა ჯანელიძემ.

14 დეკემბერს გავრცელებული ცნობით, ბელგიის დედაქალაქში ოკუპანტი რეჟიმის წარმომადგენლები აფხაზეთის პოპულარიზაციისადმი მიძღვნილ გამოფენაში მონაწილეობდნენ.

ღონისძიებას ბელგიის სამეფოში რუსეთის საელჩოს მრჩეველი-დესპანიც ესწრებოდა. ამ შეხვედრის შესახებ ქართულმა მხარემ ბრიუსელისგან ინფორმაცია ოფიციალურად უკვე გამოითხოვა.