გიორგი გაბუნია: ჩვენი ხელისუფლების ერთ-ერთი უმთავრესი მიზანია, რომ წინასაარჩევნო პროცესი მაქსიმალურად დემოკრატიულ გარემოში ჩატარდეს
პოლიტიკა

გიორგი გაბუნია
ფოტო: საქართველოს პარლამენტი
ჩვენი ხელისუფლების ერთ-ერთი უმთავრესი მიზანია, რომ წინასაარჩევნო პროცესი მაქსიმალურად დემოკრატიულ გარემოში ჩატარდეს. ნებისმიერ პოლიტიკურ სუბიექტს შესაძლებლობა ექნება წინასაარჩევნო კამპანია აწარმოოს, შეხვდეს მოსახლეობას, - განაცხადა „დღის ქრონიკაში“ საზოგადოება „ქართულის“ ლიდერმა, კულტურის საპარლამენტო კომიტეტის თავმჯდომარე გიორგი გაბუნიამ.
როგორც გაბუნიამ აღნიშნა, „ქართული ოცნების“ მერობის კანდიდატები ყოველდღიურად ათეულობით შეხვედრას ატარებენ, საზოგადოებას ხვდებიან.
„ჩვენ ძალიან კარგი მოლოდინები გვაქვს. „ქართულ ოცნებას“ აქვს გაცილებით უფრო მყარი საზოგადოებრივი მხარდაჭერა, ვიდრე ეს იყო საპარლამენტო არჩევნების წინა პერიოდში. დარწმუნებული ვარ, რომ ჩვენ პირველივე ტურში დამაჯერებლად გავიმარჯვებთ.
რაც შეეხება რადიკალების გეგმებს, მათი გეგმები არის დესტრუქცია. მათ იციან, რომ არანაირი შანსი იმისა, რომ დემოკრატიული გზით ხელისუფლებაში მოვიდნენ, არ აქვთ. ყველანაირად ცდილობენ, რომ სიტუაცია დამძიმდეს, მოხდეს არეულობა და სამოქალაქო დაპირისპირება. “, - აღნიშნა გიორგი გაბუნიამ.
ადგილობრივი თვითმმართველობის ორგანოების არჩევნები 4 ოქტომბერს ჩატარდება.





