ბექა ოდიშარია: ჰელსინკის ჯგუფი მტკნარ სიცრუეს ტირაჟირებს, ეს არის ცინიზმის მწვერვალი, მიზანია, საქართველო რამენაირად იყოს დადანაშაულებული, შეიცვალოს მშვიდობისმყოფელი ხელისუფლება

არ ვიცი, რა ამოცანები და მიზნები აქვს ჰელსინკის ჯგუფს, როდესაც მტკნარ სიცრუეს ტირაჟირებს. ეს გახლავთ ცინიზმის უმაღლესი მწვერვალი, - ამის შესახებ პარლამენტის დიასპორისა და კავკასიის საკითხთა კომიტეტის თავმჯდომარემ, ბექა ოდიშარიამ განაცხადა.

მას ჰკითხეს, ჰელსინკის კომისიის განცხადებაზე, სადაც ნათქვამია, რომ „საქართველოს მთავრობა ეყრდნობა შავ ფულს, რომელსაც მთელ მსოფლიოში მოქმედი თაღლითური ქოლცენტრებიდან იღებს, რათა დააფინანსოს თავისი ოპერაციები და დევნოს ოპოზიცია“.

ოდიშარიას შეფასებით, ეს „წარმოუდგენლად უსამართლო“ განცხადებაა.

„ეს გახლავთ ცინიზმის უმაღლესი მწვერვალი. ჩვენი ქვეყანა ყველაფერს აკეთებს გამჭვირვალობისთვის და იმ უკიდურესად პრინციპული ბრძოლისათვის, რომელიც სწორედ ქოლცენტრებთან არის დაკავშირებული. კარგად გახსოვთ ჩვენი აქტიური მოქმედებები ევროპოლთან, გერმანიის პროკურატურასთან გამოვლენილი დანაშაულები, დამნაშავეები, კეზერაშვილზე მომზადებული BBC-ის ფილმი. BBC არ არის „ტვ პირველი“, „მთავარი“ ან „ფორმულა“, ეს არის უდიდესი სანდოობის მქონე მედიაპლატფორმა. გამომძიებელმა ჟურნალისტებმა, გერმანელ პროკურორებთან ერთად, პარალელურად აწარმოვეს გამოძიება და პირდაპირ ხელი დაადეს, მისტერ ოფშორი უწოდეს. მხარი ხომ არ ეცვალათ შემთხვევით? პირდაპირ ზედაპირზეა „ნაციონალური მოძრაობის“, კოლექტიური „ნაციონალური მოძრაობის“, მისი მედიასაშუალების დამფინანსებლის მიერ ჩადენილი დანაშაული. ის დადანაშაულებული იქნა მსოფლიოში ერთ-ერთი ყველაზე ობიექტური მედიაპლატფორმის, BBC-ის მიერ, ისევე როგორც ევროპელი სამართალდამცავების მიერ.

ეს ყველა დანაშაული პირდაპირ სარკისებური ეფექტით გადააბრალო იმ ხელისუფლებას, რომელიც ევროპულ ძალოვან სტრუქტურებთან თანამშრომლობს ასეთი ტიპის დანაშაულის აღკვეთისა და გამოვლენისთვის? ასეთივე ტიპის უტიფარი განცხადებები იყო ჩვენი მეხუთე კოლონის და „ენჯეოების“, ასევე ზოგიერთი ევროპელი ვაიპოლიტიკოსების და ვითომ საქართველოს მეგობრების მხრიდან, თითქოს საქართველო იყო რაღაც ხვრელი, რათა თავი აერიდებინათ სანქციებისათვის და რუსეთისათვის საბრძოლო მასალასთან გათანაბრებული გარკვეული საგნები მიგვეწოდებინა. მადლობა ღმერთს, ჩამობრძანდნენ სანქციებთან დაკავშირებული უმაღლესი თანამდებობის პირები, აშშ-ის უმაღლესი წარმომადგენელი, ევროკავშირისა და დიდი ბრიტანეთის, თავად გაეცნენ ადგილზე ვითარებას და ესეც გაბათილდა.

არ ვიცი, ჰელსინკის ჯგუფს რა ამოცანები და მიზნები აქვს, როდესაც ასეთ მტკნარ სიცრუეს ტირაჟირებს. თავს ვიკავებ, მათი საქციელი უფრო მკვახედ არ მოვიხსენიო. ყველაზე რბილი იქნებოდა გაუაზრებლობა და ინფორმაციის არქონა, მაგრამ ეჭვი მაქვს, ერთიც აქვთ და მეორეც, უბრალოდ სულ სხვა მიზანი აქვთ. მიზანი ნათელია, საქართველო რამენაირად იყოს დადანაშაულებული, მშვიდობისმყოფელი ხელისუფლება შეიცვალოს და ხელისუფლებაში მოვიდეს ხელის ბიჭების, გოგოების ხროვა, რომელიც გარედან ნაბრძანებ ნებისმიერ დავალებას შეასრულებს“, - განაცხადა ბექა ოდიშარიამ.