გივი მიქანაძე: არასამთავრობოებმა თავისი განცხადებებით ფაქტობრივად აღიარეს, რომ ეს სექტორი არ არის გამჭვირვალე
პოლიტიკა

გივი მიქანაძე
ფოტო: ვიდეოკადრი
ის განცხადებები, რაც ჩვენ მოვისმინეთ არასამთავრობო სექტორის წარმომადგენლებისგან საბაზისო კვლევასთან მიმართებით, ძალიან სუსტი და არგუმენტისგან დაცვლილი იყო. ამაში საზოგადოება თვითონვე დარწმუნდა, - ამის შესახებ პარლამენტის განათლების, მეცნიერებისა და ახალგაზრდობის კომიტეტის თავმჯდომარემ, საპარლამენტო უმრავლესობის წევრმა გივი მიქანაძემ დღეს გამართულ ბრიფინგზე განაცხადა.
მისივე თქმით, ეს იყო მცდელობა იმისა, რომ როგორმე ისრები სხვა მიმართულებით გადაეტანათ, ყურადღება სხვა მიმართულებით წასულიყო.
„საზოგადოებას ორი კვირის წინ ჩვენ წარვუდგინეთ საბაზისო კვლევის ანგარიში, რომელიც ეხებოდა იმ არასამთავრობო და მედია ორგანიზაციების გამჭვირვალობასა და ინფორმაციის ხელმისაწვდომობას, რომლებმაც მიმდინარე წლის 8 აპრილს, 474-მა ორგანიზაციამ ხელი მოაწერა ერთობლივ განცხადებას და რაც ეხებოდა მათ წინააღმდეგობას გამჭვირვალობის კანონის მიღებასთან დაკავშირებით. საზოგადოებამ კიდევ ერთხელ ნათლად გაიგო იმის შესახებ, თუ როგორი გაუმჭვირვალეა ეს სექტორი და ფაქტობრივად თითზე ჩამოსათვლელი ორგანიზაციები აკმაყოფილებდნენ იმ მინიმალურ სტანდარტს, რომელიც გამჭვირვალობასთან და ინფორმაციის ხელმისაწვდომობასთან არის დაკავშირებული. ამის შემდეგ რიგი არასამთავრობო ორგანიზაციების წარმომადგენლებმა გააკეთეს განცხადებები, რომლითაც შეეცადნენ, რომ როგორღაც გადაეფარათ ეს საკითხი და მათ განაცხადეს იმის თაობაზე, რომ მაგალითად მცირე ლოკალურ თემის და რეგიონულ ორგანიზაციებს არა აქვთ ვებგვერდი და შესაბამისად ამისი ფინანსური ხარჯები, რითაც ისინი ცდილობდნენ დაესაბუთებინათ, რომ ინფორმაციის არ ჰქონდა ვებგვერდის მეშვეობით სწორედ ამით იყო განპირობებული. თუმცა რა თქმა უნდა მთავარი მიზნისთვის ეს ვერანაირი გამართლება ვერ იქნება. აქ საუბარი არის საზოგადოების წინაშე ანგარიშგებაზე.
ასევე გაკეთდა ძალიან საინტერესო და უცნაური განცხადებები იმის შესახებ, რომ თითქოს და კონფიდენციალური ინფორმაციაა იმ ადამიანების სამუშაო ადგილი, ვინც არასამთავრობო სექტორში არის დასაქმებული და ამის ვალდებულება არ არსებობს, რომ გუნდის წევრები გასაჯაროვდეს. მაშინ როდესაც, ჩვენ ვიცით ძალიან კარგად, რომ დონორ ორგანიზაციებს ეს ორგანიზაციები დეტალურ ინფორმაციას აწვდიან, მათ შორის, იმ ადამიანების შესახებ ვინც პასუხისმგებელნი არიან კონკრეტული პროექტების განხორციელებაზე. ანუ რა გამოდის, რომ საზოგადოების წინაშე არ არის ვალდებულება ამ ადამიანების შესახებ ინფორმაციის მიწოდების, მაგრამ დონორი ორგანიზაციების, ვინც თანხას უხდის, რა თქმა უნდა, მათ წინაშე ყველა ინფორმაცია ხსნილია და დეტალურად არის მიწოდებული.
ის განცხადებები, რაც ჩვენ მოვისმინეთ არასამთავრობო სექტორის წარმომადგენლებისგან საბაზისო კვლევასთან მიმართებაში ძალიან სუსტი და არგუმენტისგან დაცლილი იყო. ამაში საზოგადოება თვითონვე დარწმუნდა და ეს იყო მცდელობა იმისა, რომ როგორმე ისრები სხვა მიმართულებით გადაეტანათ, ყურადღება სხვა მიმართულებით წასულიყო და ის რეალური ფაქტი, რაც მათ გაუმჭვირვალობას ასაბუთებდა ეს კიდევ ერთხელ რაღაცნაირად გადაფარულიყო. თუმცა ეს ასე ვერ მოხდა და ვერ მოხდება, მათ თავისი განცხადებებით ფაქტობრივად აღიარეს ის, რომ ეს სექტორი არ არის გამჭვირვალე და უფრო მეტსაც გეტყვით განცდა ჩნდებოდა მათი განცხადებებიდან, კიდევ ერთხელ ასეთი შეგრძნება იყო, რომ ჩვენ რატომ უნდა ვიყოთ გამჭვირვალე. ასეთი პათოსი დასდევდა მათ განცხადებებს.
ამ ორი კვირის განმავლობაში თერთმეტმა ორგანიზაციამ, ჩვენ ვაკვირდებოდით პროცესს, გარკვეული ინფორმაციები განაახლა, შეავსო, რაც რა თქმა უნდა, ცუდი არ არის, მაგრამ ეს კიდევ ერთხელ მათი მხრიდან იყო იმის აღიარება, რომ თუნდაც საბაზისო, მინიმალურ სტანდარტს ეს ორგანიზაციები ვერ აკმაყოფილებდნენ“, - განაცხადა გივი მიქანაძემ.





