აზერბაიჯანისა და სომხეთის პრემიერ-მინისტრების ისტორიული შეხვედრა თბილისში პრემიერ ირაკლი ღარიბაშვილის მეთაურობით. ფოტო/ვიდეო

ყარაბაღში განვითარებული მოვლენების შემდეგ აზერბაიჯანისა და სომხეთის პრემიერ მინისტრები პირველად ერთმანეთს პირისპირ თბილისში შეხვდნენ. აუდიენცია ირაკლი ღარიბაშვილის ორგანიზებით გაიმართა. სომხეთისა და აზერბაიჯანის მხარეები ორ ქვეყანას შორის არსებულ კონფლიქტზე რამდენიმე საათის განმავლობაში პირისპირ მსჯელობდნენ.

ორ სახელმწიფოს შორის ურთიერთობის ნორმალიზების უზრუნველსაყოფად ახლა აზერბაიჯანი და სომხეთი ახალ ეტაპზე გადადიან. საქართველო კი მთავარი შუამავლის როლს უკვე რამდენიმე წელია ასრულებს. ოფიციალური თბილისის ამოცანა, რეგიონის გრძელვადიანი მშვიდობის პირობებში განვითარებაა.

შეგახსნებთ, ირაკლი ღარიბაშვილის მონაწილეობით არაერთი შეხვედრა უკვე გაიმართა, რაც კონკრეტული შედეგითაც დასრულდა. საქართველომ აზერბაიჯანსა და სომხეთს მოლაპარაკებების პლატფორმა ბოლოს მიმდინარე თვეში, თბილისში ილჰამ ალიევის ოფიციალური ვიზიტის დროს შესთავაზა, რაზეც მზაობა აზერბაიჯანის ლიდერმა მაშინვე დაადასტურა.

სამი ქვეყნის პრემიერების ისტორიული შეხვედრის შემდეგ, ირაკლი ღარიბაშვილმა „თბილისის აბრეშუმის გზის ფორუმში“ მონაწილე დელეგაციების ხელმძღვანელებს მათ პატივსაცემად გამართულ გალა ვახშამზე უმასპინძლა.

“თბილისის აბრეშუმის გზის ფორუმი“ პრემიერ-მინისტრ ირაკლი ღარიბაშვილის პატრონაჟით იმართება. ფორუმს მსოფლიოს 60-მდე ქვეყნის 2000-მდე დელეგატი ესწრება.
“თბილისის აბრეშუმის გზის ფორუმი”, რომელიც 2015 წელს საქართველოს პრემიერ-მინისტრმა ირაკლი ღარიბაშვილმა დააფუძნა, საქართველოში უკვე მეოთხედ იმართება.