ირაკლი კობახიძე: „საქართველოს ეროვნული ბანკის შესახებ“ კანონის გარშემო აჟიოტაჟი მიუთითებს იმაზე, რომ ვიღაცას სურს ხელოვნურად გააღრმაოს ინსტიტუციური კრიზისი ეროვნულ ბანკში

ერთადერთი განსხვავება ვეტოსა და ჩვენ მიერ მიღებულს კანონს შორის იყო ის, რომ ვეტო ითვალისწინებდა 3 ვიცე-პრეზიდენტის არსებობას ეროვნულ ბანკში და ჩვენი კანონი ითვალისწინებდა პირველ ვიცე-პრეზიდენტს პლუს 2 ვიცე-პრეზიდენტს, - ამის შესახებ „ქართული ოცნების“ თავმჯდომარემ და საპარლამენტო უმრავლესობის ლიდერმა ირაკლი კობახიძემ „საქართველოს ეროვნული ბანკის შესახებ“ ორგანულ კანონში ცვლილებებზე და პრეზიდენტის ვეტოს დაძლევაზე საუბრისას განაცხადა.

„მეტი განსხვავება არ იყო ამ ორ კანონს შორის. შესაბამისად, ამის გარშემო აჟიოტაჟი რომ არის შექმნილი, ეს მიუთითებს იმაზე, რომ ვიღაცას სურს ხელოვნურად გააღრმაოს ინსტიტუციური კრიზისი ეროვნულ ბანკში. ჩვენი ერთადერთი მიზეზი იყო ხელი შეგვეშალა ამისთვის და სწორედ ამის გამო დავძლიეთ ვეტო“, - განაცხადა კობახიძემ.

პარლამენტის თავმჯდომარე შალვა პაპუაშვილმა „საქართველოს ეროვნული ბანკის შესახებ“ ორგანულ კანონში ცვლილების შეტანის თაობაზე კანონპროექტს მოაწერა ხელი. ცვლილების შედეგად, ეროვნულ ბანკში იქმნება პირველი ვიცე-პრეზიდენტის თანამდებობა, რომელსაც დანიშნავს და გაათავისუფლებს ეროვნული ბანკის საბჭო.