ირაკლი ღარიბაშვილი ზოგიერთ არასამთავრობოზე: ეს ადამიანები პირდაპირ ემსახურებიან შუღლის გაღვივებას, ძალიან ბევრ პროვოკაციაში არიან ჩართული. ჩვენი ამოცანაა, იცოდეს ხალხმა, თუ რას ემსახურება მათი საქმიანობა. აი, ეს იყო მთავარი მოტივაცია

ეს ადამიანები პირდაპირ ემსახურებიან შუღლის გაღვივებას ძალიან ბევრ პროვოკაციაში არიან ჩართული, - ამის შესახებ საქართველოს პრემიერ-მინისტრმა, ირაკლი ღარიბაშვილმა, ტელეკომპანია „იმედის“ ეთერში განაცხადა.

პრემიერით თქმით, ამოცანა არის, იცოდეს ხალხმა თუ რას ემსახურება მათი საქმიანობა.

„ასევე მინდა გითხრათ რამდენიმე მაგალითი. მე მქონდა საუბარი რამდენიმე ჩვენს უცხოელ პარტნიორთან, მეგობრებთან და მათ მკითხეს, მაგალითად რომელი არასამთავრობოს საქმიანობის გამჭვირვალობას ითხოვთ თქვენ, ან რომლის საქმიანობა იწვევს კითხვებს. რამდენიმეს ჩამოვთვლი, ბევრს აღარ გავაგრძელებ, არ შევაწყენ საზოგადოებას, მაგალითად ცნობილი თავისი დესტრუქციული ქმედებებით და პროვოკაციებით, ე.წ. სირცხვილიას მოძრაობა, რომელიც ფინანსდება პირდაპირ უცხოური ორგანიზაციების მხრიდან, მათ შორის უცხო ქვეყნების სახელმწიფო ორგანიზაციების მხრიდან. ჩვენ ვნახეთ, რომ ეს ორგანიზაცია შემდეგ აქ ითხოვდა მთავრობის გადადგომას, ჩემს გადადგომას, ძალიან ბევრი დესტრუქციული ქმედება განხორციელდა მათ მიერ, ან უშუალოდ მათ მიერ ან მათი თანამონაწილეობით. ჩვენ ვიცით ე.წ. პროვოკაციული მოძრაობა „თბილისი პრაიდი“, რომელიც აპირებდა მეტად პროვოკაციული ღონისძიებების ჩატარებას, ე.წ. პარადების ჩატარებას, გახსოვთ კარგად ხომ? ამან ძალიან დიდი მღელვარება გამოიწვია. ეს ყველაფერი უკავშირდება სწორედ მათ დესტრუქციულ საქმიანობას. ორგანიზაცია „იემსი“ მაგალითად. შეიძლება ძალიან ბევრმა არ იცის, მაგრამ მე ვიცი, თუ რამდენად დესტრუქციული საქმიანობით არის დაკავებული ეს ორგანიზაცია. ეს ადამიანები პირდაპირ ემსახურებიან შუღლის გაღვივებას, ძალიან ბევრ პროვოკაციაში არიან ჩართული. საერთაშორისო გამჭვირვალობა, ძალიან ბევრი ორგანიზაცია, იგივე „ისფედი“, რომელმაც პირდაპირ გაყალბებული მონაცემები წარმოადგინა, მე ვგულისხმობ არჩევნების დღეს და შემდგომ პერიოდში პარალელური დათვლის შედეგები იყო გაყალბებული, რომელიც მათ მერე აღიარეს. ჩვენი ამოცანა არის ვიცოდეთ, იცოდეს ჩვენმა ხალხმა თუ რას ემსახურება მათი საქმიანობა. აი, ეს იყო მთავარი მოტივაცია“, - განაცხადა ირაკლი ღარიბაშვილმა.