გიორგი ამილახვარი კეზერაშვილზე: მის წინაშე აღძრულია არა ერთი საქმე კორუფციულ ბრალდებებზე და ამ ფულს უკან უკანონოდ აბრუნებს ქართულ პოლიტიკაში და ცდილობს ოპოზიციური ველი გააკონტროლოს

დეოლიგარქიზაციის კანონში პირდაპირ რომ ჩავწეროთ სახელი და გვარი - დავით კეზერაშვილი, ამაზე კითხვის ნიშანი არავის ექნება, - ამის შესახებ საპარლამენტო უმრავლესობის წევრმა, გიორგი ამილახვარმა განაცხადა.

„ელენე ხოშტარიამ თქვა, რომ მას აფინანსებს დავით კეზერაშვილი, რასაც ახლა ხაბეიშვილიც ამბობს. სახეზე გვაქვს პირდაპირი მტკიცებულება ადამიანის, რომელმაც სახელმწიფოს მოჰპარა ფული, მის წინაშე აღძრულია არა ერთი საქმე კორუფციულ ბრალდებებზე და ამ ფულს უკვე უკან, უკანონოდ აბრუნებს ქართულ პოლიტიკაში და ცდილობს ამით ოპოზიციური ველი გააკონტროლოს“, - განაცხადა გიორგი ამილახვარმა.

„ნაციონალურ მოძრაობაში“ დაპირისპირება და ბრძოლა გავლენის მოსაპოვებლად გრძელდება. რა როლი აქვს ამ პროცესში დავით კეზერაშვილს - კვლავ მთავარ კითხვად რჩება. ამ კითხვას პასუხი ნაწილობრივ ლევან ხაბეიშვილმა უკვე გასცა. ერთ-ერთ გამოცემასთან ინტერვიუში მან დაადასტურა, რომ გარკვეულ აქტივობებს და ზოგიერთ ოპოზიციონერს სწორედ კეზერაშვილი აფინანსებს. „ქართული ოცნებისთვის“ თავდაცვის ყოფილი მინისტრის ფინანსები ქართულ პოლიტიკაში შავ ფულს ნიშნავს.