გია ცაგარეიშვილი: კანონი დეოლიგარქიზაციის შესახებ შეეხება ყველა იმ ადამიანს, რომელიც ქართულ პოლიტიკაში ოლიგარქიული საქმიანობით არის დაკავებული. ასეთი არის ბატონი კეზერაშვილი და ასეთი არ არის ბატონი ივანიშვილი

კანონი დეოლიგარქიზაციის შესახებ შეეხება ყველა იმ ადამიანს, რომელიც ქართულ პოლიტიკაში ოლიგარქიული საქმიანობით არის დაკავებული. ასეთი არის ბატონი კეზერაშვილი და ასეთი არ არის ბატონი ივანიშვილი. და ეს მშვენივრად იციან „ნაციონალურ მოძრაობაში“, - ამის შესახებ საპარლამენტო უმრავლესობის წევრმა გია ცაგარეიშვილმა გადაცემაში „იმედი LIVE“ განაცხადა. დეპუტატმა განმარტა რას ითვალისწინებს დეოლიგარქიზაციის შესახებ კანონპროექტის უკრაინული მოდელი.

„უკრაინულ კანონში რამდენიმე პირობაა: ადამიანი უნდა აკონტროლებდეს მედიას, ადამიანი უნდა იყოს პოლიტიკაში ჩართული, ადამიანს უნდა ჰქონდეს ბიზნესი ქვეყანაში. ივანიშვილი უკვე მესამე წელია წასულია პოლიტიკიდან, არ ფლობს მედიასაშუალებებს და ასევე ა ფლობს ბიზნესებს საქართველოში. სამივე კრიტერიუმს ნათლად აკმაყოფილებს ბატონი კეზერაშვილი და არა მხოლოდ ის, სხვა ბატონებიც, მათ შორის პარლამენტის ყოფილი წევრები, რომლებიც ახლა აფინანსებენ სხვადასხვა მედიასაშუალებებს თუ პოლიტიკურ პარტიებს“, - განაცხადა ცაგარეიშვილმა.