სამთავრობო პროგრამის შესრულების ანგარიში: მთავრობის მიზანი ოკუპირებულ რეგიონებში მცხოვრები, კონფლიქტით დაზარალებული მოსახლეობის მდგომარეობის გაუმჯობესება და ხელოვნურად გაყოფილ საზოგადოებას შორის თანამშრომლობის ხელშეწყობაა

საქართველოს სამთავრობო პროგრამის შესრულების ანგარიშში, რომელიც 2021 წლის ივნისიდან 2022 წლის მაისამდე პერიოდს მოიცავს, შერიგებისა და ჩართულობის პოლიტიკას ცალკე თავი ეთმობა. დოკუმენტში ხაზგასმულია, რომ მთავრობის პრიორიტეტი მოსახლეობის მდგომარეობის გაუმჯობესება და მშვიდობაზე ორიენტირებული პოლიტიკის წარმოებაა.

„საქართველოს მთავრობა საანგარიშო პერიოდში აგრძელებდა აქტიურ და შედეგზე ორიენტირებულ შერიგებისა და ჩართულობის პოლიტიკას, ჩართულობის სტრატეგიისა და სამოქმედო გეგმით, ასევე სამშვიდობო ინიციატივით − „ნაბიჯი უკეთესი მომავლისკენ“ გათვალისწინებული მიმართულებებისა და სტატუს-ნეიტრალური მექანიზმების ეფექტიანი განხორციელების გზით, რაც მიზნად ისახავდა საქართველოს ოკუპირებულ რეგიონებში მცხოვრები, კონფლიქტის შედეგად დაზარალებული მოსახლეობის სოციალურ-ეკონომიკური მდგომარეობის გაუმჯობესებას, ასევე ხელოვნურად გაყოფილ საზოგადოებას შორის დიალოგის, ნდობის აღდგენისა და საერთო ინტერესებზე დაფუძნებული თანამშრომლობის ხელშეწყობას“, - აღნიშნულია ანგარიშში.

154-გვერდიანი დოკუმენტი, რომელიც სამთავრობო პროგრამის შესრულების ოთხ ძირითად მიმართულებას აერთიანებს, უკვე პარლამენტშია.