მესამე სექტორი: მოვუწოდებთ პარლამენტს, გენერალურ აუდიტორად დაამტკიცოს პოლიტიკურად ნეიტრალური კანდიდატი

11 არასამთავრობო ორგანიზაცია ერთობლივ განცხადებას ავრცელებს და პარლამენტს გენერალურ აუდიტორად პოლიტიკურად ნეიტრალური პირის არჩევას ურჩევენ. მათი განცხადებით, მმართველი გუნდი გენერალური აუდიტორის კანდიდატს საკუთარ რიგებში ეძებენ.

“მიგვაჩნია, რომ კრიტიკულად აუცილებელია ხელისუფლებამ გამოავლინოს პოლიტიკური ნება დამოუკიდებელი გენერალური აუდიტორის დასამტკიცებლად, რომელიც არ იქნება ასოცირებული რომელიმე პოლიტიკურ ძალასთან, ანგარიშვალდებული იქნება მხოლოდ კონსტიტუციასთან და პარლამენტთან. ეს აუცილებელი წინაპირობაა სახელმწიფო აუდიტის სამსახურის, როგორც კონსტიტუციური ინსტიტუტის, დამოუკიდებელობის უზრუნველსაყოფად.

ბოლო წლების განმავლობაში აუდიტის სამსახური ჩამოყალიბდა, როგორც მიუკერძოებელი და პოლიტიკური გავლენებისგან დამოუკიდებელი ორგანო, რაც აღნიშნულია ასევე არასამთავრობო ორგანიზაციების ანგარიშებში. ეს მნიშვნელოვანი მიღწევაა 2012 წლამდე არსებული გამოცდილების გათვალიწინებით.“ - წერია არასამთავრობო ორგანიზაციების ერთობლივ განცხადებაში.

ერთობლივ განცხადებაში ავტორები გენერალურ აუდიტორსა და ყოფილ მთავარ პროკურორს შორის მომხდარ ინციდენტსაც ეხებიან და აცხადებენ.რომ მის გარშემო კვლავ რჩება კითხვები.

25 ივლისს სახელმწიფო აუდიტის სამსახურის მოქმედი გენერალური აუდიტორის უფლებამოსილების ხუთწლიანი ვადა ამოიწურა. ახალ გენერალურ აუდიტორს პარლამენტის თავმჯდომარის წარდგინებით, სიითი უმრავლესობით ირჩევს საქართველოს პარლამენტი.