არასამთავრობოები სტრასბურგის მოსამართლეობის კონკურსის შედეგების გაუქმებას ითხოვენ

მესამე სექტორი სტრასბურგის სასამართლოს მოსამართლეობის კანდიდატების შესარჩევი კონკურსის შედეგების გაუქმებას ითხოვს. არასამთავრობოები სიის ამჯერადაც ჩავარდნას არ გამორიცხავენ.

"რამდენიმე ძალიან ძლიერი, კომპეტენტური და კეთილსინდისიერი ადამიანი ხელოვნურად დაბლოკეს", - ამბობს "ახალგაზრდა იურისტთა ასოციაციის" თავმჯდომარე ანა ნაცვლიშვილი.

"ხელისუფლებამ საკუთარი ფავორიტი კანდიდატების გაყვანა უზრუნველეყო", - აცხადებს "დემოკრატიული ინიციატივის" თავმჯდომარე გიორგი მშვენიერაძემ.

"კონკურსის შედეგები არის უსამართლო, არ იძლევა არჩევანის გაკეთების შესაძლებლობას და უნდა გაუქმდეს. ხელისუფლებამ კონკურსი გამოიყენა გზავნილად, რომ მორჩილ მოსამართლეებს წაახალისებენ, დამოუკიდებელ და კომპეტენტურ კადრებს კი, დაბლოკავენ", - წერია კოალიციის "დამოუკიდებელი და გამჭვირვალე მართლმსაჯულებისთვის" განცხადებაში.

მთავრობამ სტრასბურგის მოსამართლეობის სამი კანდიდატი 1 ივნისს შეარჩია - ლადო ჭანტურია, სოფიო ჯაფარიძე და შოთა გეწაძე.

საკონკურსო კომისიამ ხუთი კანდიდატი 28 მაისს შეარჩია. ყველაზე მაღალი ქულები ლადო ჭანტურიამ (5), სოფიო ჯაფარიძემ (4.69), შოთა გეწაძემ (3.85), თამარ ალანიამ (3.77) და ირაკლი დონდოლაძემ (3.69) მიიღეს.

სია ევროპული საბჭოს საპარლამენტო ასამბლეის ადამიანის უფლებათა ევროპული სასამართლოს მოსამართლის ამრჩევ კომიტეტს წარედგინება (საბოლოო ვადა 31 აგვისტო). კენჭისყრა ევროპული საბჭოს საშემოდგომო სესიაზე, ოქტომბერში ჩატარდება.

ახალი მოსამართლის არჩევამდე, სტრასბურგის სასამართლოში საქართველოს მოსამართლე ნონა წოწორიაა.

ევროპული საბჭოს საპარლამენტო ასამბლეის ადამიანის უფლებათა ევროპული სასამართლოს მოსამართლის ამრჩევმა კომიტეტმა საქართველოდან წარდგენილი სია - ევა გოცირიძე, ალექსანდრე ბარამიძე, გიორგი ბადაშვილი - 24 იანვარს ჩააგდო. სია თავიდან არის წარსადგენი.