სოზარ სუბარი: ოპოზიციისთვის უკეთესი იქნებოდა თუ გამოიყენებდნენ შანსს, რაც ამომრჩეველმა მისცა და შემოვიდოდნენ პარლამენტში

ყველას აქვს უფლება აქციები გამართოს, თუმცა ოპოზიციისთვის უკეთესი იქნებოდა თუ გამოიყენებდნენ იმ შანსს, რაც ამომრჩეველმა მისცა და შემოვიდოდნენ პარლამენტში. ბუნებრივია, პარლამენტში მუშაობა არ უშლის მათ ხელს აქციების გამართვაში, - ამის შესახებ რეგიონული პოლიტიკისა და თვითმმართველობის კომიტეტის თავმჯდომარემ, სოზარ სუბარმა განაცხადა.

მისი თქმით, ნებისმიერი მშვიდობიანი აქცია დაშვებულია კანონით.

„ჩვენ ყველამ დავინახეთ ამ რვა წლის განმავლობაში ოპოზიციის აქციების რაოდენობა. კი ბატონო, შეუძლიათ გამართონ აქციები, ნებისმიერი მშვიდობიანი აქცია არის დაშვებული კანონით. თუ გადაიზრდება ეს კანონის დარღვევაში როგორც იყო 20 ივნისის შტურმი პარლამენტზე, ეს ისევე დაიგმობა და აღიკვეთება როგორც მაშინ აღიკვეთა. ეს ისეთივე დანაშაულია როგორიც იყო კაპიტოლიუმის შტურმი და კაპიტოლიუმში შეჭრა, თვისობრივად, ამ ორ მოვლენას შორის განსხვავება არ არის, განსხვავება არის მარტო შინაარსში, კაპიტოლიუმში მოახერხეს შეჭრა და სამწუხაროდ, 4 ადამიანი დაიღუპა.

დანარჩენი, კანონის ფარგლებში ყველას აქვს უფლება აქციები გამართოს, თუმცა ოპოზიციისთვის უკეთესი იქნებოდა თუ გამოიყენებდნენ იმ შანსს, რაც ამომრჩეველმა მისცა და შემოვიდოდნენ პარლამენტში. ბუნებრივია, პარლამენტში მუშაობა არ უშლის მათ ხელს აქციების გამართვაში“ - განაცხადა სოზარ სუბარმა.