მიხეილ სარჯველაძე ვადამდელ არჩევნებზე: შეუძლებელია საუბარი წითელი ხაზის მოშლაზე
პოლიტიკა

მიხეილ სარჯველაძე
ფოტო: საქართველოს პარლამენტი
ერთადერთი დაშვება, რა შემთხვევაშიც შესაძლებელი იქნებოდა ხელახალი არჩევნების ჩატარება. ეს იყო, თუ დადასტურდებოდა არჩევნების გაყალბების ფაქტი, რაც არ დადასტურდა, - ამის შსახებ პარლამენტის ადამიანის უფლებათა დაცვის კომიტეტის ხელმძღვანელმა, მიხეილ სარჯველაძემ განცხადა.
მისივე თქმით, არავითარი წინაპირობა არ არსებობს იმისათვის, რომ რაიმე ფორმით დაკმაყოფილდეს ოპოზიციის მოთხოვნა, თუნდაც მომდევნო წელს ვადამდელი საპარლამენტო არჩევნების გამართვის შესახებ.
„პირადად მე, ასეთ მოთხოვნას არ ვეთანხმები და ასეთ გადაწყვეტილებას არც განვიხილავ. როგორც კი დაიწყო დისკუსია 31 ოქტომბრის არჩევნებთან დაკავშირებით, იმთავითვე გაკეთდა მკაფიო განცხადება, რომ ჩვენი ხელისუფლებისთვის ეს არის წითელი ხაზი, რომელიც უკავშირდება ვადამდელი არჩევნების ჩატარებას. ერთადერთი დაშვება, რა შემთხვევაშიც შესაძლებელი იქნებოდა ხელახალი არჩევნების ჩატარება. ეს იყო, თუ დადასტურდებოდა არჩევნების გაყალბების ფაქტი, რაც არ დადასტურდა. აქედან გამომდინარე, შეუძლებელია საუბარი წითელი ხაზის მოშლაზე. რაც შეეხება საკითხს, თუ როგორ უნდა დადასტურდეს ეს, ჩვენ უნდა მივეჩვიოთ ინსტიტუტებისა და სამართლებრივი პროცედურების პატივისცემას.
რაც შეეხება მეხუთე რაუნდს, პირადად ჩემთვის რაუნდებისა და შეხვედრების ნუმერაცია არ მგონია, აუცილებელი და მიზანშეწონილი იყოს. ვფიქრობ, მნიშვნელოვანია მხარეები განწყობილი ვიყოთ მოლაპარაკებისთვის, რომლის შედეგადაც ასევე მნიშვნელოვანია, ჩვენი ქვეყნისთვის საუკეთესო გადაწყვეტილება მოიძებნოს. მოლოდინი, რა თქმა უნდა, არსებობს იმაზე, რომ შესაძლოა შეთანხმება შედგეს", - განაცხადა მიხეილ სარჯველაძემ.
მამუკა ხაზარაძემ, ერთ-ერთი ტელევიზიის ეთერით განაცხადა, რომ კარგი იქნება, თუ ვადამდელი არჩევნები 2021 წელს ჩატარდება, თუმცა, მანვე აღნიშნა, რომ ეს არარეალურია და ვადამდელი არჩევნები სრულად პროპორციული სისტემით 2022 წელს უნდა ჩატარდეს.





