სალომე სამადაშვილი: „რესპუბლიკური პარტიის“ წარმომადგენლებმა ნათლად თქვეს, რომ პარლამენტში „ნაცმოძრაობის“ გადაწყვეტილების გარეშე არ შევლენ

ყველა ადამიანი, რომელიც გასულია პარლამენტში „ერთიანი ნაციონალური მოძრაობის“ სიით და ბლოკიდან, ყველას აქვს უკვე დაწერილი განცხადება პარლამენტის დატოვებაზე, - ამის შესახებ ტვ.„პირველის“ ეთერში „ნაციონალური მოძრაობის“ ერთ-ერთმა ლიდერმა სალომე სამადაშვილმა განაცხადა.

რაც შეეხება „რესპუბლიკურ პარტიას“, სალომე სამადაშვილის განცხადებით, პარტიის წევრები გულშემატკივრობენ მოლაპარაკების პროცესს და დღეს დეპუტატის უფლებამოსილების შეწყვეტაზე განცხადება ამიტომ არ დაწერეს, თუმცა ძალიან ნათლად განაცხადეს, რომ არ აპირებენ პარლამენტში შესვლას „ერთიანი ნაციონალური მოძრაობის“ გადაწყვეტილების გარეშე.

სამადაშვილის განცხადებით, ასე დიპლომატებთან მოლაპარაკებებს აქტიურად უჭერს მხარს პარტიის ლიდერი გრიგოლ ვაშაძე. „მეც მომხრე ვარ ამ მოლაპარაკებების“, - აღნიშნა სამადაშვილმა.

5-მა ოპოზიციურმა პარტიამ დეპუტატის მანდატზე უარის თქმისა და საარჩევნო სიების ჩახსნის შესახებ დოკუმენტები გააფორმა. ოპოზიციის მიერ მომზადებული დოკუმენტების ხელმისმოწერის პროცესს არ დასწრებიან პარტიები: „გირჩი“, „რესპუბლიკური პარტია“ და „ალეკო ელისაშვილი - მოქალაქეები“. „გირჩი“ და "რესპუბლიკური პარტია" აცხადებენ, რომ პარლამენტში არ შედიან და დეპუტატის მანდატზე უარს ამბობენ, უბრალოდ ამის დამადასტურებლად ცერემონიებში მონაწილეობის საჭიროებას ვერ ხედავდნენ.

პროპორციული საარჩევნო სიის ანულირების მოთხოვნით, ცენტრალურ საარჩევნო კომისიას ამ დროისათვის ხუთმა ოპოზიციურმა ძალამ მიმართა, ესენია: „ერთიანი ნაციონალური მოძრაობა - ძალა ერთობაშია”, „ევროპული საქართველო”, „ლეიბორისტული პარტია”, „სტრატეგია აღმაშენებელი” და „ლელო საქართველოსთვის“.