დავით სერგეენკო: თუ პარტია მიიჩნევს, რომ მისი ინტერესები დასავლურია, ყურადღებით უნდა მოუსმინოს პარტნიორების ცალსახა რეკომენდაციებს
პოლიტიკა

დავით სერგეენკო
ფოტო: არქივი
„ქართული ოცნების“ წევრი დავით სერგეენკო მიიჩნევს, რომ ხელისუფლებასა და ოპოზიციას შორის მოლაპარაკების რესურსი არსებობს. ამის შესახებ მან მეათე მოწვევის პარლამენტის პირველი სხდომის დაწყებამდე ჟურნალისტებს განუცხადა.
მისი თქმით, თუ ადამიანი ან პოლიტიკური პარტია და პოლიტიკოსი თვლის, რომ მისი ინტერესები არის დასავლური, ევროინტეგრაციის და ფიქრობს, რომ ამერიკის შეერთებული შტატები საქართველოს პარტნიორია, ყურადღებით უნდა მოუსმინოს მათ ცალსახა რეკომენდაციებს. „არ უნდა ჩათვალოს, რომ ჩვენ კი პატივს გცემთ, მაგრამ თქვენს ნათქვამს არ გავითვალისწინებთო. ეს გაუგებარია. მოლაპარაკების რესურსი არსებობს“, - აღნიშნა დავით სერგეენკომ.
აშშ-ის საელჩოსა და ევროკავშირის დელეგაციამ დღეს განცხადება გაავრცელა, სადაც ყველა მხარეს, მოუწოდა, საგულდაგულოდ განიხილონ შესაძლებლობები შეთანხმების მისაღწევად, რომელიც საშუალებას მისცემს პარლამენტს, შეასრულოს სრულყოფილი როლი.





